Në frymën e humanizmit dhe solidaritetit, si dhe në nderim të jetës dhe sakrificës sublime të heronjve të kombit Zahir Pajaziti, Edmond Hoxha dhe Hakif Zejnullahu, u organizua aktiviteti humanitar i dhurimit vullnetar të gjakut me moton “Dhuro gjak, shpëto jetë”, në Kullën e Zahir Pajazitit në Orllan.
Ky aktivitet kishte për qëllim jo vetëm sensibilizimin e qytetarëve për rëndësinë jetike të dhurimit të gjakut, por edhe nderimin e figurave të ndritura të historisë sonë, të cilët dhanë jetën për lirinë dhe të ardhmen e vendit. Përmes këtij akti human, u dëshmua se vlerat e sakrificës, solidaritetit dhe përgjegjësisë shoqërore vazhdojnë të jenë të gjalla ndër breza.
Me këtë rast, 74 qytetarë dhuruan vullnetarisht gjak, duke dhënë një kontribut të drejtpërdrejtë dhe të çmuar për shpëtimin e jetëve të njerëzve në nevojë, si dhe për forcimin e rezervave të gjakut.
Procesi i dhurimit u realizua me profesionalizëm dhe përkushtim nga ekipet shëndetësore të Transfuzionit të Gjakut, të cilët garantuan standarde të larta mjekësore dhe siguri për të gjithë dhuruesit.
Shprehim mirënjohje të veçantë për të gjithë dhuruesit, stafin shëndetësor dhe të gjithë ata që kontribuan në realizimin e këtij aktiviteti domethënës. Nderimi i heronjve bëhet më i plotë kur shoqërohet me vepra konkrete në shërbim të jetës dhe njerëzimit.
Organizimi i këtij aktiviteti u bë nga organizata OPED, e cila përmes këtij angazhimi dëshmon përkushtimin e vazhdueshëm në promovimin e vlerave humane dhe aktiviteteve me interes të përgjithshëm shoqëror.
