Prokuroria Themelore në Gjilan, në bashkëpunim me Policinë e Kosovës, ka ndaluar një person të dyshuar për veprën penale të kanosjes ndaj gazetarëve.
“Dyshohet se më datën 30 janar 2026, rreth orës 14:30 minuta në Gjykatën Themelore në Gjilan – Dega në Viti, pas përfundimit të një seance gjyqësore që ishte duke u zhvilluar në ambientet e Gjykatës në Viti, i dyshuari A.I iu drejtohet ekipit të Gazetës Nacionale dhe monitoruesit të Betimi për drejtësi, në formë kërcënuese, me veprime konkludente, siç dokumentohen edhe nëpërmjet videoingjizimit të kamerës”, thuhet në njoftim.
Veprimet kërcënuese, sipas Prokurorisë, janë dokumentuar edhe përmes video-incizimeve të kamerave.
Sipas njoftimit, pas autorizimit të Prokurorisë për veprime hetimore dhe për shkak se i dyshuari ishte i paarritshëm, ai ishte shpallur në kërkim policor. Më 3 shkurt 2026, A.I është arrestuar dhe pas intervistimit, me vendim të prokurorit të rastit, është ndaluar për 48 orë për veprën penale “Kanosje”, nga neni 181 i Kodit Penal të Republikës së Kosovës.
Prokuroria Themelore në Gjilan ka bërë të ditur se brenda afateve ligjore do të vendosë për masën e sigurisë ndaj të dyshuarit, në përputhje me Kodin e Procedurës Penale.
