Policia e Kosovës, respektivisht Drejtoria për Hetimin e Krimit të Organizuar, në bashkëpunim edhe me Prokurorinë e Shtetit, kanë arrestuar të martën në rajonin e Prishtinës katër persona të dyshuar për disa vepra penale. Ky aksion thuhet se është marrë në vazhdën e realizimit të objektivave strategjike dhe planeve operacionale të policisë, që kanë për qëllim luftimin e veprimtarive kriminale që ndërlidhen me fushën e krimit të organizuar.
“Gjatë realizimit të këtij operacioni policor, i cili ka rrjedhur pas zbatimit të masave të fshehta teknike të hetimit dhe vëzhgimit nga Prokurori i Shtetit, të dyshuarit në mënyrë të organizuar si grup i rrezikshëm kriminal, dyshohet se kanë kryer vepra penale si: “vrasje në tentativë”, “shkaktim i rrezikut të përgjithshëm”, “lëndim i rëndë trupor”, “zjarrvënie”, “detyrim” dhe “armëmbajtje pa leje’.”, thuhet në njoftimin e Policisë,
Sipas këtij institucioni, këta persona janë paguar për këto shërbime, me qëllim të frikësimit dhe lëndimit të viktimave. E sipas policisë, të arrestuarit i kanë përcjellë për një kohë të gjatë viktimat, të cilat edhe i kanë identifikuar.
“Viktimat janë të profileve të ndryshme, ku disa nga viktimat e identifikuara kanë qenë direkt të sulmuar, të cilët edhe kanë pësuar lëndime trupore. Për shkak të rrezikshmërisë së lartë, arrestimi i personave të dyshuar është bërë në mbështetje të Njësisë Speciale Intervistuese dhe Njësisë së Reagimit të Shpejtë”, thuhet në njoftim.
Të dyshuarit e arrestuar janë: D. S. I vitit 1980; Xh. M i lindur më 1979; H. H i vitit 1960 dhe: T. Sh i lindur më 1973.
Gjatë kontrollit dhe bastisjeve të kryera në prona/shtëpi banimi, në cilësi të provave materiale janë sekuestruar: dy armë të gjata, katër armë të shkurtra, 43 fishekë, pesë mijë (5,000,00) euro, dy automjete, 4 telefona dhe mjete të forta.
“Me vendim të prokurorit kompetent nga Prokuroria Themelore në Prishtinë, katër (4) të dyshuarit e arrestuar janë dërguar në mbajtje, për të vazhduar me procedura të mëtejme ligjore”, thuhet në njoftimin e Policisë.
Kjo e fundit apelon tek të gjithë qytetarët e Kosovës të cilët kanë qenë apo edhe ende janë viktimë e përfshirjes së veprave penale në fjalë, të lajmërohen në Polici në stacionet më të afërta, apo edhe të kontaktojnë në linjat telefonike të bëra publike.
