Kryeministri i Kosovës, Albin Kurti, priti sot në një takim presidentin e Shqipërisë, Bajram Begaj, i cili po qëndron në Kosovë në prag të shënimit të 15 vjetorit të pavarësisë.
Takimi u mbajt në objektin e Qeverisë.
“Gjatë qëndrimit në Kosovë zhvillova një takim me kryeministrin e Republikës së Kosovës, z. Albin Kurti, me të cilin biseduam për sfidat e sigurisë për dy shtetet tona, veçanërisht në Veriun e Kosovës.
Ritheksova qëndrimin se sovraniteti dhe integriteti territorial i Kosovës janë të pacenueshme. Shqipëria do të jetë gjithmonë në krah të Kosovës”.
Gjatë ditës ai është pritur me nderime shtetërore nga presidentja e vendit, Vjosa Osmani.
Në një postim në Twitter, ajo shkroi se janë krah për krah njëri-tjetrit në kremtimin e pavarësisë.
“Krah njëri-tjetrit në kremtimin e 15 vjetorit të Pavarësisë së Republikës së Kosovës! Krah njëri-tjetrit drejt familjes së përbashkët evropiane! Krah njëri-tjetrit gjithnjë…”, shkroi Osmani.
