Gjykata Themelore në Prishtinë – Departamenti për të Mitur ka shpallur sot aktgjykimin në rastin dhunimit të 11-vjeçares, që kishte ndodhur në gusht të vitit 2022 dhe që kishte tronditur opinionin në Kosovë, por edhe jashtë vendit.
Kjo gjykatë ka bërë rikualifikimin e veprave penale dhe ndarjen e dispozitiveve për të përcaktuar përgjegjësinë penale për secilin nga personat e dyshuar në këtë rast.
“Gjykata nuk ka gjetur që e dëmtuara të ketë qenë e trafikuar apo viktimë e veprës penale të trafikimit me njerëz. I akuzuari E.R është shpallur fajtor për veprën penale Dhunimi dhe ndaj tij është shqiptuar dënim me burgim në kohëzgjatje prej pesëmbëdhjetë (15) vjetëve, në të cilën llogaritet koha e kaluar në paraburgim”, thuhet në njoftimin e gjykatës.
Tutje në njoftim janë bërë të ditura edhe dënimet për të përfshirët tjerë në këtë vepër penale.
“I mituri XH.S është shpallur fajtor për veprën penale Dhunimi dhe për veprën penale – Keqpërdorim i Fëmijëve në Pornografi dhe është dënuar me dënim me burgim për të mitur në kohëzgjatje prej tetë (8) viteve. I mituri G.R është shpallur fajtor për veprat penale Dhunimi, Keqpërdorim i Fëmijëve në Pornografi dhe veprën penale Ndihmë në kryerjen e veprës penale Dhunimi dhe është dënuar me dënim me burgim për të mitur në kohëzgjatje prej nëntë (9) viteve. I mituri G.J është shpallur fajtor për veprën penale Dhunimi dhe veprën penale – Keqpërdorimi i Fëmijëve në Pornografi dhe ndaj tij është shqiptuar dënim me burgim për të mitur në kohëzgjatje prej tetë (8) viteve”, thuhet tutje në njoftimin e gjykatës.
Ndërkohë, i akuzuari SH.K është liruar për veprën penale Shërbime Seksuale të viktimës së trafikimit.
Vetura e përdorur dhe telefonat e përdorur janë konfiskuar, ndërsa pala e dëmtuar është udhëzuar në kontest të rregullt juridiko civil.
