Në fjalimin para deputetëve evropianë në Komisionin për Punë të Jashtme të Parlamentit Evropian, zëvendëskryeministri Bislimi foli për synimet e Kosovës në marrjen e e statusit kandidat për në PE, si aspiratë e qytetarëve të Kosovës për t’iu bashkuar BE-së, por edhe për Asociacionin, si dhe çështje të tjera.
“Objektivi ynë është i qartë, ne kërkojmë që ta marrim statusin e kandidatit deri në fund të këtij viti, ndonëse është sfidë por jemi plotësisht të angazhuar për ta arritur atë”, deklaroi Bislimi para eurodeputetëve, duke shtuar se ky hap është i rëndësishëm për zhvillimin jo vetëm të Kosovës por edhe për sigurinë rajonale.
Më tej zëvendëskryeministri Bislimi, mes tjerash, foli për qeverisjen e vendit në këto dy vjetët e fundit ku përmendi luftimin e krimit t organizuar dhe të korrupsionit, duke përmendur reformat në drejtësi dhe në administratë publike.
Ai foli edhe për Asociacionin e komunave me shumicë serbe në marrëveshjen e djeshme, ku sipas zëvendëskryeministrit Bislimi pala kosovare ishte në pajtim me planin franko-gjerman.
Ai për Asociacionin tha se është institucion joqeveritar, që mundëson koordinim mes komunave me shumicë serbe.
Veç kësaj, Bislimi shtoi se duhet pasur parasysh se ai asociacion duhet të jetë në përputhje me legjislacionin e Kosovës, pastaj duhet të jetë në përputhje me qëndrimin e Bashkimit Evropian, teksa përkujtoi letrën e Federica Mogherinit drejtuar ish-kryeministrit të Kosovës, ku specifikohet se çfarë mund të jetë e çfarë jo dhe sipas letrës, s’do të ketë kompetenca ekzekutive, si dhe ai asociacion nuk duhet të jetë nivel i tretë qeverisës.
