Sipas Gjykatës Supreme, qytetarët, të cilët kanë paguar për energjinë e shpenzuar në komunat veriore, kanë të drejtën e kthimit të pagesave.
“Aanulohet si i kundërligjshëm vendimi i të paditurës, ZRRE, duke detyruar që e paditura të ndërmarrë veprime që e obligojnë Shërbimin e Shpërndarjes së Energjisë Elektrike në Kosovë Sh. A., (KEDS),në Prishtinë ,që të bëjë kthimin e shumës së faturuar, respektivisht kompensimin e dëmit konsumatorëve të cilët janë faturuar për shpenzimin e energjisë elektrike në katër komunat veriore të Republikës së Kosovës dhe atë për periudhën kohore nga data 06.02.2012 deri më dt. 20.10.2017, në shumë prej dyzet milion e tetëqind e pesëdhjetë e pesë mijë e katërqind e tetëdhjetë euro(40,855,480.00€),të gjitha këto në afat prej 15 ditësh nga dita e pranimit të këtij aktgjykimi nën pasojat e ekzekutimit me detyrim”, thuhet në vendimin e Gjykatës Supreme.
Më tej, në vendim konstatohet se Gjykata Themelore, si dhe ajo e Apelit, kanë konstatuar gjendjen faktike dhe në mënyrë të drejtë kanë aplikuar aprovimin e kërkesës për padi nga ana e Avokatit të Popullit në cilësinë e paditësit, ndërsa ka anuluar vendimin e ZRRE-së.
“Prandaj në këtë çështje edhe e drejta materiale nga gjykatat e instancave më të ulëta është aplikuar në mënyrë të drejtë sipas gjendjes faktike të vërtetuar”, thuhet, mes tjerash, në vendim.
Po kështu, sipas Supremes, i padituri ka vepruar në kundërshtim me nenin 55, të Kushtetutës së Republikës së Kosovës, që rregullon rastet kur mund të kufizohen të drejtat dhe liritë e garantuara me Kushtetutë, ku, më tutje, konkludon se praktika e faturimit nuk është në përputhje me Ligjin për Rregullatorin për Energjinë Elektrike, nga se është bërë trajtim i pabarabartë i banorëve të katër komunave veriore të Kosovës në raport me banorët në pjesët tjera, dhe se i njëjti faturim nuk është i autorizuar me ligj.
