Zbatim të plotë të të gjitha pikave të marrëveshjes së dakorduar mes Kosovës dhe Serbisë në Ohër, ka kërkuar të dielen kryeministri Albin Kurti.
Me një postim në rrjetet sociale, kreu i Qeverisë së Kosovës tha se marrëveshja e arritur në Ohër duhet të zbatohet plotësisht.
“Ne kemi kaluar 2 vitet e fundit në Bruksel duke diskutuar një marrëveshje ligjërisht të detyrueshme mes Kosovës dhe Serbisë”, deklaroi kryeministri i Kosovës.
Ai tha se nuk duhet të ketë zbatim të pjesshëm dhe as vonesa në zbatimin e saj.
“Më 18 mars në Ohër, HR/VP Josep Borrell shpalli zyrtarisht marrëveshjen”.
“Ajo që është rënë dakord tani duhet të zbatohet plotësisht dhe menjëherë”, deklaroi Kurti.
“Asnjë zbatim i pjesshëm dhe pa vonesa”.
Takimi i radhës në Bruksel mes kryeministrit të Kosovës, Albin Kurti dhe presidentit të Serbisë, Aleksandar Vuçiq, pritet të mbahet më 2 maj 2023.
Në këtë takim pritet të nënshkruhet deklarata për çështjen e personave të pagjetur.
Kosova dhe Serbia janë dakorduar për propozimin e Bashkimit Evropian dhe për zbatimin e aneks marrëveshjes.
Megjithatë, presidenti i Serbisë, Aleksandar Vuçiq, ditë më parë ka deklaruar se nuk do të zbatojë të gjitha pikat e saj, por vetëm disa pjesë të kësja marrëveshje.
Nga ana tjetër, Brukseli dhe Washingtoni zyrtar kanë deklaruar se kjo marrëveshje është e obligueshme për të dy palët.
