Rusia po përpiqet të përdorë një armë sekrete për të bllokuar hyrjen në internet të ushtrisë ukrainase përmes Starlink, raportoi Washington Post duke cituar një raport të klasifikuar të inteligjencës amerikane që u zbulua së fundmi në Discord.
Sipas informacioneve nga The Washington Post, Moska ka eksperimentuar me sistemin e saj të luftës elektronike Tobol për muaj të tërë në një përpjekje për të bllokuar funksionimin e ofruesit të shërbimit satelitor të internetit Starlink në Ukrainë.
Një sistem i krijuar për të mbrojtur satelitët rusë thuhet se mund të përdoret për të sulmuar sistemet e armikut. SpaceX, kompania që zotëron Starlink, nuk pranoi të komentojë mbi këtë informacion.Në maj të vitit të kaluar, Musk njoftoi në Twitter se Starlink kishte demonstruar rezistencën e saj ndaj përpjekjeve të bllokimit dhe hakerimit, por se rusët dukej se po intensifikonin përpjekjet e tyre.
Washington Post shkruan se Starlink ka rezultuar jetike për ushtrinë e Ukrainës, e cila mbështetet në terminale të vegjël portativë për të komunikuar dhe transmetuar inteligjencë. Forcat ruse kanë çaktivizuar përdorimin e pajisjeve të tjera të komunikimit, duke përfshirë radiot dhe celularët, por sinjalet satelitore janë më të vështira për t’u bllokuar.
