Kryeministri i Republikës së Kosovës, Albin Kurti, bashkë me zëvendëskryeministren për Çështje të Pakicave dhe Drejtat e Njeriut, Emilja Redžepi, ministrin e Shëndetësisë Arben Vitia, ministrin e Kulturës, Rinisë dhe Sportit, Hajrulla Çeku dhe anëtarë të tjerë të kabinetit qeveritar, në ditën e Fitër Bajramit, kanë vizituar Bashkinë Islame të Kosovës, me ç’rast janë pritur nga Myftiu Naim Tërnava.
Duke uruar Myftiun Tërnava dhe gjithë besimtarët për festën e Bajramit, kryeministri Kurti ka uruar që përkushtimi për anën shpirtërore të njeriut gjatë jetës dhe solidariteti shoqëror e farefisnor të mos jetë i kufizuar vetëm në këtë muaj, por të jetë në secilin muaj të gjithë vitit.
Me këtë rast, ai falënderoi dhe shprehu mirënjohje për Bashkësinë Islame të Kosovës për rolin e madh historik e shoqëror të Bashkësisë Islame të Kosovës në historinë tonë më të re.
“E dimë që nga lufta e fundit çlirimtare 37 hoxhallarë imam i kemi dëshmorë të kombit sot dhe në këtë stinën e pranverës kur për çdo ditë përkujtojmë masakra dhe beteja na duhet të ecim midis varreve ku ka emra të martirëve e dëshmorëve, në mesin e të cilëve aq shumë janë edhe imam, e aq shumë janë edhe besimtarë. Kjo tregon për rolin e madh që ka pasur Bashkësia Islame për çështjen tonë kombëtare dhe ne jemi përherë falënderues e mirënjohës.
Kryeministri Kurti tha se nga Myftiu Tërnava janë njoftuar sa shumë është rritur solidariteti në popullsi pikërisht gjatë muajit të shenjtë të Ramazanit.
Faleminderit shumë Myfti e urime edhe njëherë të gjithëve Fitër Bajrami! /Kosovatimes/
