Ministri i Financave, Hekuran Murati, duke debatuar gjatë seancës së sotme të Kuvendit me deputetin e LDK-së, Driton Selmanaj lidhur me çështjen e të pagjeturve, ka thënë se LDK-ja nuk ka të drejtë morale e as profesionale të flas për këtë çështje.
“Vetëm për t’ia rikujtuar në Washington çka ka nënshkruar Qeveria Hoti, është: të dyja palët zotohen të përshpejtojnë përpjekjet që të lokalizojnë dhe identifikojnë mbetjet e personave të humbur. Më poshtë thotë: do t’i koordinojmë këto përpjekje mes Beogradit dhe Prishtinës. Domethënë as emri i shtetit s’figuron në marrëveshje. Së paku emrin e shtetit është dashtë ta përmendni për gjërat e tilla. A keni qenë ju i nderuar deputeti Selmanaj në atë kohë, a i keni lexuar çfarë po nënshkruani, a e keni pa çka po shkruan në atë tekst. Ju lutem, nuk keni të drejtë morale e as profesionale për të folur për këto tema sepse ju kanë tejkaluar këto tema”, ka theksuar Murati.
Në anën tjetër, deputeti Driton Selmanaj duke iu drejtuar ministrit të Financave ka thënë se VV-ja nuk mund të arrijë atë që ka arritur LDK-ja në Shtëpinë e Bardhë, edhe sikur ai t’i ketë tri jetë.
“Unë po provoj të diskutoj së paku me njerëzit që na shikojnë sepse po e shoh që vërtetë nuk ia vlen me nivelin e tillë të ndajmë as muhabete. Në marrëveshjen e Washingtonit ti djalë i mirë, që ka ndodhë në Shtëpinë e Bardhë e jo në villën e Titos në Ohër, jemi marrë vesh për zotime. Këtu ke nënshkruar marrëveshje me Serbinë, ku e ke amnistuar Serbinë, ku e ke barazuar institucionalisht përgjegjësinë për të zhdukurit në Kosovë dhe e ke heq mundësinë që njerëzit me pas të drejtë të kërkojnë kompensim. Këto janë dëmet e mëdha që ju kanë bërë këtij vendi. Dhe po të them se edhe tri jetë mi pas ti s’ke me mund me e mbërri çfarë kemi arritur në Shtëpi të Bardhë”, ka thënë ai.
PDK akuzon kryeministrin për instrumentalizim të çështjes së të pagjeturve
Deputetja e Partisë Demokratike të Kosovës, Eliza Hoxha, ka shprehur akuza ndaj kryeministrit Albin Kurti në seancën e sotme të Kuvendit lidhur me miratimin e Deklaratës për Personat e Zhdukur në takimin e nivelit të lartë në Bruksel.
Hoxha ka akuzuar kryeministrin se e ka instrumentalizuar këtë çështje. Ajo ka thënë se shefi i ekzekutivit do të duhej të ishte në seancë dhe t’u kërkonte falje familjarëve të të pagjeturve, për dy mashtrimet, që ajo pretendon, se ai i ka bërë.
“Besoj të gjithë sa herë vini në këtë sallë kaloni nëpër korridorin që sjell rrëfime të shumta të familjarëve të të pagjeturve. E di që shumë nga ju jeni ndjerë të trubulluar nga shkelja e trupave dhe vijave që vijëzojnë mungesën e trupave të pagjetur por uroj që i keni lexuar edhe ato fragmente të shkurtra nga muret për ndjenjën e familjarëve që ende janë në pritje. E më 2 maj, në Bruksel, rrëfimi i tyre është rrokullisur, dhimbja e tyre është përmbysur, është barazuar e barasvlerësuar. Kryeministri i Kosovës ka shpikur një term të ri, i cili nuk ekziston në Konventat ndërkombëtare e që nuk njihet as si kategori juridike. Për ta thjeshtësuar, Serbia nuk e ka asnjë obligim juridik në kuptimin e reparacionit dhe çështjet e tjera që lidhen me të pagjeturit në Kosovë”, ka theksuar ajo.
Deputetja e PDK-së ka thënë tutje se sot ka zgjedhur të jetë zëri i tyre, teksa ka lëshuar në foltore edhe këngën e saj “Për ata që (s’)janë”, e cila u kushtohet të zhdukurve nga lufta e fundit.
