Prokuroria Themelore në Ferizaj ka bërë të ditur se është duke e realizuar sot një aksion kundër fajdesë. Sipas njoftimit të Prokurorisë, në këtë aksion janë duke u kontrolluar dhe bastisur shtëpi dhe lokale përcjellëse në lokacione të ndryshme në Prishtinë dhe Podujevë.
Aksioni është zhvilluar në bashkëpunim me Policinë e Kosovës, Drejtorinë për Hetimin e Krimeve të Rënda (DHKR) në Prishtinë dhe njësive tjera mbështetëse.
Lidhur me këtë aksion, me vendim të Prokurorit të Shtetit, janë ndaluar katër persona të dyshuar në kohëzgjatje prej 48 orësh për shkak të dyshimit të bazuar të veprave penale “Fajdeja”, “Shmangia nga tatimi” ,“Detyrimi” dhe “Organizim i skemave piramidale dhe bixhozi te paligjshëm”.
“Në bazë të urdhëresës së lëshuar nga Gjykata Themelore në Ferizaj për lëshimin e urdhëresës për kontroll dhe sekuestrim të përkohshëm të shtëpive dhe lokaleve përcjellëse, sot, është duke e realizuar një aksion ku, me ç’rast gjatë këtij aksioni, janë duke u kontrolluar dhe bastisur, shtëpi dhe lokale përcjellëse në lokacione të ndryshme, konkretisht në qytetin e Prishtinës dhe Podujevës, për shkak të dyshimit të veprave penale “Fajdeja” nga neni 331 par.3 lidhur me par. 1 të Kodit Penal të Republikës së Kosovës, “Shmangia nga tatimi” nga neni 307 par.1 lidhur me par 3 të KPRK-së ,“Detyrimi” nga neni 328 par.2 të KPRK-së dhe “Organizim i skemave piramidale dhe bixhozi te paligjshëm” nga neni 294 par 3 i KPRK-së”, thuhet në njoftimin e Prokurorisë.
Prokuroria Themelore në Ferizaj thotë se do të informojë opinionin në vazhdimësi lidhur me këtë aksion.
