Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione sot mban mbledhje.
Në këtë mbledhje bëhet shqyrtimi i Projektligjit për aderimin në Marrëveshjen për Statusin dhe Funksionet e Komisionit Ndërkombëtar për Personat e Zhdukur, raporton RTKlive.
Ndryshe Qeveria e Kosovës ditë më parë ka miratuar Projektligjin për ratifikimin e marrëveshjes për statusin dhe funksionet e Komisionit Ndërkombëtar për Personat e Zhdukur. Kjo marrëveshje mundëson nisjen e procedurave për anëtarësimin e Kosovës në Komisionin Ndërkombëtar për Personat e Zhdukur (ICMP), me seli në Hagë.
Kryeministri, Albin Kurti kishte thënë se janë të përkushtuar për zbardhjen e zhdukjeve me dhunë gjatë luftës në Kosovë.
“Qeveria e Kosovës është e përkushtuar për të zbardhur zhdukjet me dhunë gjatë luftës, ku në shërbim të kësaj po iniciojmë aderimin e Kosovës në ISMP. Kjo nismë shton mundësitë për rritje të bashkëpunimit rajonal e më gjerë në procesin e ndriçimit të fatit dhe vend-ndodhjes së personave të zhdukur me dhunë, po ashtu i shërben rritjes së kapaciteteve të mjekëve ligjore dhe specialistëve të tjerë të fushës së antropologjisë dhe arkeologjike forenzike në institucionet tona”, tha ai.
Në këtë mbledhje po ashtu bëhet edhe shqyrtimi i Peticioneve.
