Kryeministri i Kosovës, Albin Kurti, deklaroi të premten se arsimi cilësor është baza më e qëndrueshme për të ardhmen e një vendi.
Këtë deklaratë Kurti e bëri në Krushë të Madhe të Rahovecit, në përurimin e shkollës së re Fillore dhe të Mesme të Ulët “Bajram Curri”, ku mori pjesë edhe ministrja e Arsimit, Shkencës, Teknologjisë dhe Inovacionit, Arbërie Nagavci, kryesuesi i Komisionit Qeveritar për Personat e Zhdukur, Andin Hoti dhe kryetari i Rahovecit, Smajl Latifi .
Duke e konsideruar këtë si festë të dyfishtë, kryeministri Kurti tha se “në Krushën e Madhe, të dhembjes së madhe, po na bashkon gëzimi”.Fëmijët e lindur në liri, sipas tij, po festojnë të lirë.
“Kjo shkollë e mban emrin e një atdhetari tonë të madh, të lindur këtu në Krushë të Madhe, pra Bajram Currit, të cilit në vitin që shkoi e kishim 160-vjetorin e lindjes. Si veprimtar i çështjes sonë kombëtare që u angazhua edhe për shkollën shqipe, duke ndihmuar për themelimin e klubeve e shkollave shqipe në Kosovë dhe duke mbrojtur alfabetin e gjuhës shqipe të vendosur në Kongresin e Manastirit. E sot, bashkë po përurojmë një shkollë të re në vendlindjen e tij të dashur për të gjithë neve”, tha kryeministri Kurti..jpg)
“Arsimi cilësor është baza më e qëndrueshme për prosperitet për të ardhmen. Për ta ngritur cilësinë dhe për të përmirësuar kushtet arsimore, e kemi rritur buxhetin e arsimit edhe në këtë vit. Tanimë kemi siguruar 18 milionë euro për investime fillestare për vitet e ardhshme në teknologjinë e informacionit dhe komunikimit në infrastrukturën përkatëse në shkolla”, tha ai. /Kosovatimes/
