Një gjykatë sllovake liroi të premten për herë të dytë një biznesmen të akuzuar se qëndronte pas vrasjes së një gazetari investigativ në vitin 2018, në një rast që tronditi vendin dhe ndezi protesta masive kundër korrupsionit.
Marian Kočner dyshohet se urdhëroi vrasjen e 27-vjeçarit Jan Kuciak dhe të fejuarës së tij Martina Kusnirova . Katër persona u dënuan për krimin, duke përfshirë bashkëpunëtoren e Kočner, Alena Zsuzsova.
60-vjeçari Kočner përsërit se nuk është fajtor dhe në fjalimin e fundit para gjykatës javën e kaluar tha se “nuk është shenjtor, por as vrasës”.
Gazetarët që ndoqën çështjen raportuan se familjet e viktimave u larguan nga salla e gjyqit në qytetin e Pezinok pasi gjykatësi liroi Kočnerin në një gjyq që u transmetua drejtpërdrejt në internet.
Gjykata tashmë shpalli pafajësinë në vitin 2020, duke pretenduar se nuk kishte prova të mjaftueshme, por gjykata e lartë urdhëroi një rigjykim. Vendimi i ri mund të ankimohet sërish.
Vrasjet e Kuciak dhe Kusnirova ndezën protesta masive që detyruan kryeministrin e atëhershëm Robert Fico të jepte dorëheqjen dhe një qeveri e re erdhi në pushtet në vitin 2020 pas një fushate që premtoi të luftonte korrupsionin.
Por koalicioni që mundi partinë Smer të Ficos u shemb në fund të vitit të kaluar dhe Smer tani kryeson në sondazhe përpara zgjedhjeve të 30 shtatorit.
