Superjahtet e mëdha janë simbol i pasurisë dhe shitjet e tyre janë në rritje, shkruan The Business Insider . Një nga avantazhet që ofrojnë është privatësia e jashtëzakonshme. Jahtet ofrojnë një mundësi për takime në det, jashtë juridiksionit të çdo vendi dhe janë shumë të vështira për t’u spiunuar.
Vitin e kaluar , The New Yorker raportoi për botën e fshehur të takimeve të jahteve. Anijet i lejojnë të pasurit dhe të fuqishmit të flasin dhe të lidhen lirshëm larg syve kureshtarë dhe mbikëqyrjes. Shpesh është e vështirë të përcaktohet se kush është pronari i vërtetë i jahtit. Në një numër të madh rastesh, jahte të tillë blihen nga kompani të dyshimta offshore për llogari të pronarëve miliarderë.
Pas luftës në Ukrainë, sektori i superjahteve dhe strukturat e tij të ndërlikuara të pronësisë erdhën në fokus, me vendet perëndimore që kërkonin të kapnin jahte në pronësi të rusëve të pasur, të cilët janë subjekt i sanksioneve për shkak të lidhjeve të tyre me Kremlinin.
“Këto janë asete private dhe një nga arsyet pse u blenë është privatësia,” tha për BBC Sam Tucker, kreu i kërkimit të tregut të superjahteve në VesselsValue . Kjo është ajo që po përpiqen të bëjnë oficerët e inteligjencës, gazetarët investigativë dhe gazetarët e tabloidëve. Një ish marinar mbretëror, Simon Rowland tani punon privatisht dhe detyra e tij është të kontrollojë çdo kërcënim të imagjinueshëm dhe shkelje të mundshme të privatësisë në bordin e anijeve. Punët e tij përfshijnë inspektimin e jahteve charter për pajisje të vogla vëzhgimi, shmangien e dronëve të dërguar nga paparacët për të fotografuar klientët e tij të pasur, ose verifikimin e plotë të anëtarëve të ekuipazhit për t’u siguruar që ata nuk janë informatorë. “Dronët janë një shqetësim në rritje për pronarët e superjahteve”, tha ai. Niveli i kujdesit midis pronarëve ndryshon, shtoi ai, por ka nga ata për të cilët është jashtëzakonisht i rëndësishëm.
Anijet ndërtohen shpesh në Holandë, Gjermani ose Itali, ndonjëherë të ndërtuara me porosi sipas specifikimeve të sakta. Anëtarëve të ekuipazhit që punojnë në anije shpesh u kërkohet të nënshkruajnë kontrata të gjera që parandalojnë zbulimin e informacionit rreth jahteve ose pronarëve të tyre. Kostot e anijeve ndryshojnë dhe firma e ndërmjetësimit Edmiston thotë se kostot mund të variojnë nga rreth 1 milion dollarë për një jaht më të vogël deri në disa qindra milion për jahte të mëdhenj të ndërtuar me porosi.
