Asociacioni i Gazetarëve të Kosovës (AGK) ka reaguar të martën kundër dhunës që kanë përdorur serbët ndaj gazetarëve në veri. Si pasojë, gjatë natës janë demoluar veturat e ekipit të Kohës gjatë raportimit në Zveçan dhe ekipit të mediumit T7.
Në fotografitë dhe videot e publikuara nga mediumi që ka dërguar edhe AGK, shihen xhamat e thyer, gomat e shpërthyera, simbole nacionaliste të shënuara në veturë, si dhe pasqyrat i mungojnë. E në të njëjtën gjendje, sipas AKG-së, është gjetur edhe vetura e mediumit T7, e mbuluar me simbole nacionaliste serbe, xhama të thyer, e goma të shpërthyera.
“Asociacioni i Gazetarëve të Kosovës është thellësisht i shqetësuar me pamjet e dhëna nga këto dy mediume, dhe u bëjmë thirrje të gjithë kolegëve që të kenë kujdes të shtuar gjatë raportimit. Njëherësh, u bëjmë thirrje organeve kompetente që ofrojnë siguri për gazetarët që raportojnë nga këto komuna, si dhe t’i hetojnë me prioritet të gjitha sulmet ndaj medieve që kanë ndodhur gjatë ditës së djeshme”, thuhet në reagimin e AKG-së.
Edhe ekipet e RTK-së gjatë raportimit nga komunat e veriut, në protestën e djeshme kanë raportuar për dhunë verbale nga protestuesit.
