I dërguari i posaçëm i SHBA-së për Ballkanin Perëndimor, Gabriel Escobar, dhe i dërguari i posaçëm i BE-së për dialogun Kosovë-Serbi, Mirosllav Lajçak, kanë vazhduar takimet me liderë politikë në Prishtinë.
Ata fillimisht u takuan me presidenten e Kosovës, Vjosa Osmanin, e cila citohet t’u ketë thënë atyre se vetëm ndëshkimi i grupeve kriminale mund të çojë në një “stabilitet të qëndrueshëm dhe afatgjatë”.
“Prandaj presim që institucionet ligjzbatuese ta bëjnë punën e tyre, në përputhje me ligjin, në mënyrë që grupet kriminale përgjegjëse për dhunën të përballen me drejtësinë”, u tha Osmani, sipas njoftimit të Zyrës së Presidentes.
Dy emisaret jane takuar me liderët e partive opozitare në Kosovë,raporton RTKlive.
Pas takimit liderët opozitarë kanë thënë se Kosova po futet në një situatë shqetësuese dhe të paqartë, për të cilën mund të ketë edhe pasoja.
“Dëgjuam qëndrimet që janë të njohura tashmë. Shqetësimi për situatën aktuale është i madh. Kemi një situatë që po e dëmton Kosovën dhe ne shprehëm gatishmërinë që të luajmë rolin tonë si opozitë në këtë situatë. Ne do të jemi në konsultim me partnerët ndërkombëtarë për të parë se cilat janë veprimet e duhura që duhet ndërmerren”, tha kryetari i PDK, Memli Krasniqi.
“Asnjëherë nuk kemi parë një shqetësim të këtij niveli. Po futemi në një situatë shqetësuese dhe të paqartë. Në këtë fazë Kosovës i mbetet të shohë pasojat që mund t’i vijnë. Një gjendje të tillë e kemi të vështirë ta pranojmë. Kjo gjendje është e paparë për ne deri më tani. Unë i bëjë thirrje presidentes që të jetë më e qartë”, tha kryetari i LDK, Lumir Abdixhiku.
Krerët e opozitës thanë se gjatë takimit nuk kanë diskutuar për zgjedhjet në veri, por që takimi ka qenë më shumë informues për situatën aktuale.
Emisarët Escobar dhe Lajçak po ashtu kanë përfunduar takimin edhe me Listën Serbe, por nuk pasur deklarim për media.
