Që nga fillimi i pushtimit në shkallë të plotë, Ukraina ka marrë ndihmë ushtarake, financiare dhe humanitare me vlerë 170 miliardë euro. Kjo u raportua nga Ministria ukrainase e Riintegrimit të Territoreve të Pushtuara Përkohësisht duke iu referuar një studimi të Institutit të Ekonomisë Botërore të Universitetit të Kielit.
Kjo shumë përfshin ndihmën e ofruar drejtpërdrejt nga më shumë se 40 shtete, si dhe para nga organizatat ndërkombëtare, duke përfshirë FMN-në, Bankën Botërore dhe institucionet financiare të Bashkimit Evropian.
Në terma monetarë, Ukraina mori ndihmën më të madhe nga Shtetet e Bashkuara – rreth 70 miliardë euro. Vendet e BE-së ndanë kolektivisht 62 miliardë euro për Kievin. Si përqindje e PBB-së, vendet baltike dhe Polonia dërguan ndihmën më të madhe në Ukrainë.
Lista e donatorëve kryesorë përfshin gjithashtu Australinë, Britaninë e Madhe, Indinë, Kanadanë, Kinën, Zelandën e Re, Norvegjinë, Tajvanin, Turqinë, Zvicrën, Korenë e Jugut dhe Japoninë. Në total, ata i dhanë Ukrainës rreth 23 miliardë euro. Rreth 13 miliardë euro të tjera llogariten nga institucionet financiare ndërkombëtare.
Rreth 40% e ndihmës totale është ndihma ushtarake (mbi 60% në rastin e SHBA). Përafërsisht gjysma e të gjitha fondeve të alokuara janë për ndihmë financiare, pjesa e mbetur prej 10% – për mbështetje humanitare të qytetarëve ukrainas.
Një ditë më parë, Pentagoni njoftoi një paketë tjetër ndihme ushtarake prej 500 milionë dollarësh për Ukrainën, e cila përfshinte veçanërisht 55 automjete të blinduara Bradley dhe Stryker, si dhe raketa, predha dhe municione./Kosovatimes/
