Policia e Kosovës ka njoftuar për bllokim të autostradës ‘Arbër Xhaferi’ këtë të shtune dhe të diel, në itinerare të ndryshme.
Policia e Kosovës në njoftimin e saj për media thotë, se për shkak të garës çiklistike, do të ketë bllokim të përkohshëm të qarkullimit të automjeteve në autostradë në dy segmente rrugore.
“Të shtunën do të ketë bllokim në segmentin Lipian-Bibaj (autostrada ‘Arbër Xhaferi’), nga ora 13:30 do të fillojë pjesa e parë e kësaj gare, ndërkaq itinerari i garës është më i gjatë (160 km), gara fillon në ora 10:30 me këtë itinerar të lëvizjes: Bibaj-Lipjan-Prishtinë, F.Kosovë (Bresje), pastaj rruga nacionale F.Kosovë-Aeroport-Komoran-Malishevë dhe anasjelltas”, njofton policia.
E gjitha kjo, sipqs tyre, ka ardhur pasi që Federata e Çiklizmit e Kosovës (FÇK), organizon garën çiklistike Kampionati i Kosovës për vitin 2023. FÇK-ja, ka planifikuar që këtë garë ta zhvillojë në autostradë dhe për këtë ka kërkuar leje nga ministria përkatëse të cilën e ka siguruar.
“FÇK-ja për mbarëvajtje të kësaj gare ka kërkuar ndihmë nga Policia e Kosovës. Policia, bazuar në planin rreth zhvillimit të garës, datës dhe kohën e mbajtjes së saj, ka hartuar dhe do ta zbatojë një plan operativ”, thuhet më tej në njoftim.
Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik rreth këtij bllokimi e riorientim të veturave në kohen sa do të jetë duke u zhvilluar gara e organizuar nga FÇK-ja.
Andaj, qytetarët të planifikojnë me kohë qarkullimin në rrugë alternative në mënyrë që të mos krijohen tollovi e kolona të panevojshme. /Kosovatimes/
