Kryetari i PDK-së, Memli Krasniqi, ka pritur sot në selinë e partisë shefin e Zyrës së BE-së në Kosovë, Ambasadorin Tomas Szunyog.
Pas takimit, Krasniqi ka përsëritur se vendi duhet të shkojë në zgjedhje të reja të jashtëzakonshme.
“Sot, kisha kënaqësinë ta pres në selinë e PDK-së shefin e Zyrës së BE-së në Kosovë, Ambasadorin Tomas Szunyog, me të cilin diskutuam për zhvillimet e fundit politike në vend. Ambasadorit Szunyog i shpreha qëndrimin konsistent të PDK-së se integrimi euro-atlantik për Kosovën është i paalternativë dhe nuk guxon të rrezikohet nga askush. Ky është vizioni e misioni historik i shtetit dhe popullit tonë”.
“Qasja e kësaj Qeverie, përjashtuese me miq dhe koordinuese me kriminelë, për PDK-në është tërësisht e papranueshme dhe po i sjellë vetëm dëme vendit. Vetëm zgjedhjet e parakohshme mund t’ia sjellin Kosovës një Qeveri kredibile, ndryshe, dhe e cila rikthen vendin në kursin e duhur përpara. Ambasadorin Szunyog e falënderova për angazhimin e tij dhe e sigurova se PDK do të angazhohet fuqishëm që përmes të gjitha mjeteve demokratike, të luaj rolin e saj konstruktiv në interes të shtetit dhe qytetarëve tanë”, ka njoftuar Krasniqi në facebook.
Kryetari i PDK-së, sot në mesditë, ka pritur në zyrën e tij edhe ambasadorin amerikan, Jeff Hovenier. /Kosovatimes/
