Shërbimi zjarrfikës grek njoftoi sot se kanë shpërthyer 64 zjarre të reja në pyje dhe se pjesëtarët e zjarrfikësve janë duke shuar gjithsej 82 zjarre.
Zjarrfikësit grekë kanë luftuar edhe mbrëmë zjarrin në Agios, Korfuz, Karistos, Rodos dhe Ilikis dhe qytetarët në Evia janë urdhëruar të evakuohen nga shtëpitë që ndodhen në zonat e rrezikuara, raporton Katimerini.
Ministria Greke për Ndryshimet Klimatike dhe Mbrojtjen Civile njoftoi se është kryer “evakuimi më i madh ndonjëherë për shkak të zjarreve pyjore në Greqi” dhe Konstancia Dimoglidou, një zëdhënëse e policisë greke, konfirmoi se deri më tani më shumë se 30,000 njerëz janë evakuuar në të gjithë vendin.
Përfaqësuesi për media i shërbimit zjarrfikës në Rodos, Janis Artofios, konfirmoi se pjesa e përparme e zjarrit po lëviz në lindje, drejt Malonës dhe Masarit, por theksoi se aktualisht nuk kërcënon zonat e banuara.
Sipas tij, gjatë natës qindra zjarrfikës dhe vullnetarë kanë luftuar me zjarrin.
Me vendim të Sekretarit të Përgjithshëm të Mbrojtjes Civile është shpallur gjendja e jashtëzakonshme në njësinë bashkiake të Rodosit Jugor.
Në Korfuz, efektivët e shërbimit zjarrfikës po përpiqen të ndalojnë përhapjen e pjesës së përparme të zjarrit që shpërtheu pasditen e djeshme në zonën e Peritisë, në veri të Korfuzit dhe po lëviz në drejtim juglindor.
Deri më tani janë evakuuar vendbanimet Santa, Megoula, Porta, Palaia Peritia, Sinia, Viglatouri, Nisaki, Rou, Katabolo, Kentroma, Tritsi, Kokokilas, Sarakiniatika, Plagia, Kalami, Vlahatika dhe Kavaleraina.
Siç raportohet nga Roja Bregdetare Greke, është kryer një operacion për shpëtimin e njerëzve nga plazhi Nisaki në Korfuz, në të cilin kanë marrë pjesë gjashtë anije të rojes bregdetare, shtatë anije private me kapacitet të vogël, dy anije private me kapacitet të madh dhe një rimorkiator.
