Pavarësisht që fushata “Festo me zemër, jo me armë” nga institucionet shtetërore po vazhdon shtrirjen, rastet e përdorimit të armëve pa leje nëpër ahengje familjare nuk po ndalet.
Në raportin e 24 orëve të fundit nga Policia e Kosovës janë shënuar gjashtë raste të tilla.
Vetëm në Ferizaj janë shënuar tri raste të armëmbajtjes pa leje, në fshatin Greme, në fshatin Slivovë dhe në rrugën ” Kadri Zeka”. Njëri rast ka të bëjë me shtënie me pistoletë me pesë fishekë dhe tri gëzhoja. Tjetri me një pistoletë me një karikator dhe dy gëzhoja, ndërkaq rasti i tretë në këtë qytet me një pistoletë e një karikator, dy fishekë dhe tri gëzhoja. Të gjitha këto mjete janë konfiskuar nga Policia.
Edhe Podujeva ka shënuar një rast të “përdorimit të armës apo mjetit të rrezikshëm”.
“Në vendin e ngjarjes janë gjetur 29 gëzhoja të pistoletës, një predhë dhe nëntë (9) gëzhoja të pushkës gjysmë automatike të cilat janë konfiskuar. I dyshuari ka dorëzuar një pistoletë me një karikator dhe një pushkë gjysmë automatike”, thuhet në njoftimin e Policisë.
Raste të njëjta të shtënies me armë në ahengje janë shënuar edhe në Istog dhe në Mitrovicë.
“Në vendin e ngjarjes janë gjetur 14 gëzhoja të pistoletës të cilat janë konfiskuar. I dyshuari i lartcekur në mënyrë vullnetare ka dorëzuar një pistoletë me gas”, thuhet për rastin e Mitrovicës.
