Gjykata Kushtetuese ka konstatuar se vendimi i Kuvendit të Kosovës më 8 korrik 2021 për ta shkarkuar Bordin e Radio Televizionit të Kosovës nuk është në përputhje me Kushtetutën, por vendimi nuk ka efekt prapaveprues dhe nuk afekton të drejtat e fituara të palëve të treta.
Gjykata Kushtetuese ka konstatuar se shkarkimi kolektiv i bordit të transmetuesit publik për “paaftësi profesionale”, të konstatuar përmes shqyrtimit të Raportit Vjetor të RTK-së për vitin 2020, Kuvendi ka vepruar pa bazë ligjore dhe në kundërshtim me dispozitat e Ligjit për RTK-në.
Aktgjykimi thotë se Kuvendi ka tejkaluar kompetencat, ka cenuar pavarësinë e transmetuesit publikë, roli i të cilit është thelbësor për lirinë edhe pluralizmin e medieve në një shoqëri demokratike. Gjykata ka vendosur njëzëri që të deklarojë kërkesën të pranueshme dhe të refuzojë kërkesën për masë të përkohshme lidhur me efektet e vendimit të kontestuar.
Gjykata ka sqaruar se Aktgjykimi i Gjykatës, nuk ka efekt prapaveprues dhe nuk afekton të drejtat e fituara të palëve të treta, por kompensimin përkatës kur konstaton shkelje kushtetuese, anëtarë e shkarkuar të bordit mund të ndjekin procedurat përkatëse para gjykatave të rregullta.
Më 8 korrik 2021, Kuvendi i Kosovës shkarkoi Bordin e RTK-së të përbërë nga Sali Bashota, Agron Gashi, Lirim Geci, Fadil Miftari, Ilir Bytyçi, Bajram Mjeku, Petrit Musolli dhe Albinot Maloku.
Sipas njoftimit, Gjykata, ka vendosur njëzëri që të deklarojë kërkesën nga deputetët për Bordin e RTK-së të pranueshme dhe “të refuzojë kërkesën për masë të përkohshme lidhur me efektet e vendimit të kontestuar”.
“Ndërsa, me pesë vota për dhe dy vota kundër, Gjykata ka vendosur të konstatojë që vendimi [nr.08-V-036] i 8 korrikut 2021 i Kuvendit të Republikës së Kosovës për shkarkimin e të gjithë anëtarëve të Bordit të RTK-së nuk është në përputhshmëri me paragrafin 1 të nenit 7 [Vlerat] dhe paragrafin 9 të nenit 65 [Kompetencat e Kuvendit] të Kushtetutës; dhe konstatimi i lartcekur, përkatësisht Aktgjykimi i Gjykatës, nuk ka efekt prapaveprues dhe nuk afekton të drejtat e fituara të palëve të treta”, thuhet në njoftim.
Vendimi nuk do të prekë Bordin e ri të RTK-së. Por Bordi i shkarkuar ka të drejtë të ndjekë procedurat përkatëse në gjykatat e rregullta, sipas njoftimit të Kushtetueses. Vonesën dyvjeçare për të marrë vendim për këtë çështje, Kushtetuesja e ka arsyetuar se deri në dhjetor të vitit 2022, kur ishte dekretuar gjyqtari i radhës, nuk kishte kuorum vendimmarrjeje.
