Partia Socialdemokrate, përmes një aksioni simbolik, ka vendosur pesë kafazë në oborrin e Qeverisë së Kosovës, duke e akuzuar Qeverinë si autoritative që po dëshiron mbylljen e medieve.
Partia Socialdemokrate ka mbajtur aksion simbolik para ndërtesës së Qeverisë, duke i vendosur kamera e mikrofon në kafaz, që simbolizon mbështetje për gazetarët.
Aktivistja e PSD-së, Sonila Pllashniku, ka kritikuar qasjen e Qeverisë ndaj medieve. Sipas saj, kryeministri Albin Kurti i do mediet e mbyllura, të kufizuara, të disiplinuara, të varura dhe pa imagjinatë.
“Sulmi ndaj medieve është me paramendim. Caku që pushteti aktual ka vënë merr me vete krejt çka i del përpara, deri në mbërritje. Të paktën këtë e dëshiron. E kësaj nuk i shpëtojnë dot as mediet, siç nuk i shpëtuan as mësimdhënësit, as sindikatat, as tregimi për UÇK-në. E gjithë shoqëria është në shënjestër. Një vetëdije e re po tentohet të mbjellët, dhe kjo përmes falsifikimeve”, ka theksuar ajo.
