Çmimet e pasurive të paluajtshme pritet të rriten mesatarisht me nëntë për qind në vit gjatë dekadës së ardhshme, sipas një studimi të ekspertëve ekonomikë nga institucionet kryesore kërkimore gjermane dhe zvicerane të publikuar këtë javë, raporton dpa .
“Rritja e çmimeve të pasurive të paluajtshme është nxitur më shumë nga faktorët e kërkesës sesa nga oferta,” tha studiuesi Timo Wochner i Institutit IFO të Gjermanisë, i cili kreu studimin me Institutin Zviceran për Politikat Ekonomike. Rritjet e parashikuara të çmimeve të pasurive të paluajtshme në mbarë botën ndryshojnë.
Normat e pritshme të rritjes në Evropën Perëndimore (6.4 përqind) dhe në Amerikën e Veriut (7.7 përqind) janë nën mesataren botërore. Ato janë dukshëm më të larta në Evropën Jugore dhe Lindore, ku arrijnë respektivisht në 18.4 dhe 14.9 për qind. Çmimet në Azinë Jugore pritet të rriten me 25.1 për qind, në Azinë Perëndimore me 22.4 për qind dhe në Amerikën Qendrore me 24.4 për qind.
Ekspertët parashikojnë një rritje prej 8,4 për qind në Britaninë e Madhe, 7,2 për qind në Gjermani, gjashtë për qind në Shtetet e Bashkuara të Amerikës dhe 5,5 për qind në Francë. Arsyet e trendit rritës përfshijnë standardin më të lartë të jetesës dhe të ardhurat më të larta, por edhe dëshirën për më shumë hapësirë jetese dhe rritje të numrit të banorëve.
Popullariteti në rritje i punës nga shtëpia po kontribuon gjithashtu në rritjen e çmimeve, thotë studimi. Megjithatë, Wochner thotë se “faktorët nga ana e ofertës si kapaciteti i kufizuar i prodhimit, çmimet më të larta për materialet e ndërtimit dhe mungesa e tokës për ndërtim” luajnë gjithashtu një rol.
Gjithsej 1,405 ekspertë ekonomikë nga 133 vende morën pjesë në sondazh, i cili zgjati nga 14 qershori deri më 2 korrik. Shifrat nuk janë përshtatur për inflacionin, kështu që rritja reale e çmimeve ka të ngjarë të jetë më e vogël, sipas IFO.
