Deputetja e Partisë Demokratike të Kosovës, Blerta Deliu-Kodra ka thënë se emërimi i Nikolla Radomiroviqit si drejtor në Komunën e Leposaviqit, e cenon karakterin e shtetit dhe institucioneve publike të Kosovës.
Ky emërim sipas saj dëshmon se tashmë “Afera Zdravo nuk është thjeshtë një aferë e simpatisë në mes të Listës Serbe dhe Albin Kurtit”.
“Dje, mediat raportuan edhe për një aderim të ri në institucionet e udhëhequra nga pushteti: Lulzim Hetemi, kryetari i Leposaviqit nga Vetëvendosje, e ka emëruar drejtor të birin e Radoica Radomiroviqit, Nikolla Radomiroviq, ushtar i ushtrisë serbe deri vonë në Rashkë. Siç po e shihni, tashmë, Afera Zdravo, nuk është thjeshtë një aferë e simpatisë në mes të Listës Serbe dhe Albin Kurtit, por është aferë që ka implikime direkte në shoqërinë dhe në shtetin tonë, e mbi të gjitha në vetë karakterin e shtetit tonë”, tha Deliu Kodra në një konferencë për media.
Sipas saj nga audioincizimet e publikuara së fundmi u panë takimet e rregullta e të njëpasnjëshme të Kusarit me Simiqin.
“Paramendoni, kemi një qeveri, e cila duke shkelur mbi karakterin e shtetit, i akomodon interesat kombëtare të Serbisë përmes koordinimit me një kriminel ordiner si Milan Radojçiq. Kjo është ajo çfarë na shqetëson dhe duhet të na shqetësojë të gjithëve. Dhe për fund, kuptuam po ashtu se Mimoza Kusari, protagonistja e aferës Zdravo, në fakt paska mundësi të jetë protagoniste edhe e shumë përgjimeve të tjera, për të cilat paralajmëroi Simiqi, gjë që dëshmon qartë se ne dhe qytetarët e Kosovës, mund të kemi parë vetëm një pjesë fort të vogël, të llumit të madh anti-shtetëror, antikombëtar e anti-institucional, në të cilën është përfshirë qeveria Zdravo, Albin Kurti dhe Mimoza Kusari”, theksoi ajo.
Deputetja e PDK-së ka kërkuar nga organet e rendit që të hetojnë secilën veprimtari të protagonistëve të audioincizimeve të fundit, si dhe mbajtjen e zgjedhjeve të jashtëzakonshme, për siç ka thënë ajo, ndaljen e degradimit të vendit nga qeveria aktuale.
