Raporti i fundit i BQK-së, për rritjen ekonomike dhe borxhin publik në vend, dëshmon mungesë të strategjive për zhvillim ekonomik dhe tregon varfërinë nëpër të cilën po kalon Kosova. Kështu vlerësojnë njohës të fushës së ekonomisë në vend, duke theksuar se borxhi publik, duhet të merret për projekte të mëdha që ndikojnë në rritje të zhvillimit ekonomik të vendit dhe mirëqenie të qytetarëve.
Banka Qendrore e Kosovës, në raportin “Vlerësimi Tremujor i Ekonomisë”, thekson se në Kosovë, ka një rritje ekonomike prej 4 për qind, përderisa theksohet se borxhi publik ka rënë në 18.1 për qind. Kjo situatë nuk është reale, vlerësojnë njohës të ekonomisë.
Kryetari i Odës Ekonomike të Kosovës, Lulëzim Rafuna, thotë për Radio Kosovën se çështja e borxhit publik nuk është për t’u mburrur. Ai thotë se Kosova ka hapësirë ligjore për marrje të borxhit publik deri në 60 për qind, por duhet të ketë projekte konkrete, që ta kthejë atë borxh pa sfida përcjellëse.
“Ne duhet të marrim borxh për projekte që ndikojnë në zhvillim ekonomik, mos të mburremi që kemi borxhin më të ulët, por të mburremi që kemi marrë borxh dhe që kemi zhvillim ekonomik dhe që e kthejmë atë borxh pa asnjë problem dhe pa e pas një sfidë të vetme dhe, ideja për ta promovuar që kemi borxhin më të ulët, nuk më pëlqen, por duhet ta promovojmë që të kemi projekte të mira, të lëshojmë para në qarkullim, të kemi projekte që krijojnë vende për rininë që të angazhohet në vendin e vet dhe duke pas zhvillim ekonomik, e kthen edhe borxhin dhe nuk e ke problem, kështu që nuk është mburrje që e kemi borxhin më të vogël, por duhet të mendojmë pse e kemi këtë, pse nuk kemi projekte për ide më të mëdha dhe me hy me marrë borxh publik”.
E duke folur për rritje ekonomike, sipas raportit të BQK-së, ekonomisti Safet Gërxhaliu thotë për Radio Kosovën se kjo është një rritje e kamufluar dhe e pabazë.
“Në këtë kohë të inflacionit dhe në këtë kohë të krizës kur pakënaqësia sociale është në rritje e sipër, vlerësohet se kemi këtë bum ekonomik, nuk i bënë nder askujt. Nuk duhet të krenohemi që kemi borxh të vogël, sepse borxhi i vogël publik dëshmon mungesë të vizionit për zhvillim ekonomik, mungesë të një strategjie afatmesme apo afatgjatë. Prandaj këto të dhëna na shqetësojnë, dhe fakti se çdo gjë është e bazuar në rritje të konsumit dhe kjo rritje e konsumit është falë inflacionit dhe rritjes së çmimeve, e dëshmon se ende jemi vend I varur nga importi”.
Ndryshe në raportin e BQK-së, kërkesa e brendshme vlerësohet si faktori kryesor që ka kontribuar në rritje ekonomike përderisa investimet vlerësohet të kenë pasur një efekt pozitiv në aktivitetin e përgjithshëm, e konsumi rritje të ngadalësuar, kryesisht për shkak të inflacionit të lartë. Për sa i përket tregtisë së jashtme, BQK vlerëson se eksportet neto kanë pasur ndikim negativ në rritjen e aktivitetit ekonomik.
