Të hënën, qeveria australiane njoftoi blerjen e më shumë se 200 raketave të lundrimit Tomahawk nga SHBA për nevojat e Marinës Mbretërore Australiane, për të cilat do të ndajë rreth 830 milionë dollarë amerikanë, transmeton dpa .
Australia do të jetë vetëm një nga tre vendet, së bashku me Shtetet e Bashkuara dhe Britaninë e Madhe, që do të ketë raketa me rreze veprimi prej 1500 kilometrash.
Raketat me rreze të gjatë dhe armët e tjera të drejtuara janë thelbësore në një epokë të re të trazirave gjeopolitike dhe rrezikut, sipas ministrit australian të Mbrojtjes Richard Marles.
“Ne po investojmë në aftësitë që forcat tona të mbrojtjes kanë nevojë për t’i mbajtur kundërshtarët tanë në rrezik larg brigjeve tona dhe për t’i mbajtur australianët të sigurt në botën komplekse dhe të pasigurt ku jetojmë sot,” tha Marles të hënën.
Përveç kësaj, qeveria e Kanberrës miratoi blerjen e më shumë se 60 raketave anti-radar me rreze të gjatë veprimi. Këto raketa ajër-tokë do të vendosen nga flota e avionëve luftarakë të Forcave Ajrore Mbretërore Australiane.
Një vlerësim i fundit i mbrojtjes theksoi nevojën që Australia të jetë në gjendje t’i mbajë kundërshtarët në rrezik larg brigjeve australiane duke zhvilluar aftësitë e goditjes me saktësi kundër objektivave të largëta, thuhet në deklaratë. Ministri i Industrisë së Mbrojtjes Pat Conroy tha se Australia gjithashtu planifikon të ndërtojë kapacitetin e saj vendas për të prodhuar raketa me rreze të gjatë.
