Festivali “Etno Fest” tashmë ka përmbyllur edicionin e 13-të. Organizatorët kanë konfirmuar për RTK-në se sivjet për dallim nga çdo vit tjetër, interesimi i publikut ka qenë në nivelin më të lartë. Për 8 ditë me radhë, ky festival ka qenë një mundësi për njohje traditash dhe gërshetim të tyre me artin bashkëkohor.
Regjisori Fadil Hysaj, njëherët organizator i festivalit në një lidhje të drejtpërdrejtë në lajmet qendrore të RTK-së ka treguar atmosferën në natën përmbyllëse të edicionit të sivjetëm.
“Është festivali i 13-të me radhë, është periudha kur kemi jo vetëm dyfishim të programit, por edhe dyfishim të publikut. S’e kemi pritur këtë situatë, është gjendje ngazëllimi”, ka thënë ai.
Hysaj tutje ka treguar se i gjithë festivali është përpjekje për bashkim të së kaluarës tradicionale dhe të së ardhmes moderne.
“Ne jemi munduar me krijua një relacion mes artit bashkëkohor dhe kulturës tradicionale, për me krijuar një lidhje të këputur nga periudhat e më hershme…”, ka deklaruar profesori universitar.
