Ministri i Financave, Hekuran Murati, ka deklaruar se Kosova e ka përmirësuar raportin eksport-import të mallrave, në krahasim me vitin 2019.
Murati në një postim në ‘Facebook’ ka dhënë detajet e këtij progresi, teksa ka thënë se në vitin 2019 raporti eksport-import i mallrave ishte 1:9, ndërsa sot është 1:6.
“Pra për çdo euro që merrej nga malli i eksportuar, nëntë euro mall importoheshin. Me rritjen enorme të eksportit dy viteve të fundit, ky raport është përmirësuar dukshëm dhe aktualisht është 1:6”, ka shkruar Murati.
Tutje ministri ka renditur masat mbështetëse që Qeveria i ka ndërmarrë deri më tani:
“Ky hendek do të zvogëlohet edhe më tej, falë masave mbështetëse për prodhuesit tanë. 120 milionë euro për subvencionim të çmimit të energjisë elektrike. 50 milionë euro për subvencionim të produkteve bujqësore. 15 milionë euro për Masën 2.1, mbështetje për kredi investuese. 10 milionë euro mbështetje për eksport dhe certifikim të produkteve. Mbështetje në rritje të punësimit e ngritjes së kapaciteteve njerëzore. Kursim në kosto e kohë me terminalet shtetërore”, ka nënvizuar ministri i financave. /Kosovatimes/
