Presidentja Vjosa Osmani e kryeparlamentari Glauk Konjufca kanë bërë homazhe te Memoriali për të Pagjeturit, në Ditën Ndërkombëtare të të Zhdukurve.
Presidentja Vjosa Osmani në Ditën ndërkombëtare të të zhdukurve ka shpreh solidarizimin e saj me të gjitha familjet në Republikën e Kosovës të cilat ende kërkojnë më të dashurit e tyre, të cilët janë zhdukur me dhunë gjatë luftës së fundit në Kosovë.
Osmani, tha se Serbia nuk po e zbaton marrëveshjen e arritur në Bruksel për hapje të arkivave. Presidentja ka kërkuar që bashkësia ndërkombëtare ta shtojë trysninë ndaj Serbisë që t’i dorëzojë të zhdukurit me dhunë.
“Të zhdukurit më dhunë janë plaga më e thellë dhe janë dhimbja më e madhe e vendit tonë , për kundër faktit se gjatë këtij viti u arrit një marrëveshje në Bruksel dhe pastaj aneksi në Ohër që ka krijuar obligim të qartë për Serbinë për t’i hapur të gjitha arkivat ku gjinden informatat lidhur me varrezat masive dhe vend ndodhjen e të zhdukurve me dhunë gjatë luftës së fundit në Kosovë. Për kundër kërkesës së Komisionit qeveritar të bërë në qershor të këtij viti drejtuar presidentit të Serbisë që t’i hap të gjitha ato arkiva në përputhje me obligimin e marrëveshjes së Brukselit dhe të Ohrit, fatkeqësisht Serbia akoma vazhdon të bëjë shkelje flagrante t ë këtyre obligimeve dhe vazhdon ta ripërsërit krimin e saj duke e fshehur vend ndodhjen e personave të zhdukur me dhunë gjatë luftës së fundit në Kosovë. I bëj thirrje komunitetit ndërkombëtar dhe miqve aleatë që të mendojnë për prindërit dhe familjarët që ende të zhdukurit i kanë në varrezat e Serbisë. Të mendojnë për nënën që e ka varrin e zbrazët, të mendojnë për fëmijët që ende nuk e dinë ku e kanë babain, që Serbia t’i dorëzojë të pagjeturit”, theksoj Osmani.
Kurse, kryetari i Kuvendit, Glauk Konjufca tha se po nderohen të gjithë ata që i zhduku Serbia me dhunë. Sipas tij, kjo për popullin e Kosovës është një dhimbje që nuk po përfundon kurrë dhe një mungesë e drejtësisë për të gjithë familjarët që Serbia ua zhduku me dhunë më të dashurit e tyre.
“Me vet faktin që këto vitet e fundit në shumë vende të Serbisë u gjenden trupat e më të dashurve tonë, si në Peruqac, si në Rudnicë e Kizhevak, tregon se drejtësia ndërkombëtare duhet t’i kërkoj të zhdukurit me dhunë në Serbi. Po ashtu Serbia është edhe shteti ku ndodhen kriminelët që i kanë kryer këto krime. Ne çka duhet të bëjmë është se duhet t’i marrim të gjitha masat që janë në dorën e institucioneve të Kosovës, ashtu që të sigurohemi se edhe bashkësia ndërkombëtare edhe BE-ja edhe faktorët tjerë të rëndësishëm të vendimmarrjes të vetëdijesohen se ka nevojë për një trysni më të madhe në Vuçiqin dhe në institucionet e Serbisë që të zbardhet kjo çështje”, tha Konjufca.
