Lëvizja Vetëvendosje ka njoftuar se grupi i asamblistëve në Kuvendin Komunal të Prishtinës nuk do të marrë pjesë në seancën e thirrur për të hënën për shkak se e kontestojnë zgjedhjen e kryesuesit të ri dhe si të tillë, ata e vlerësojnë se kjo seancë është e panevojshme dhe tendencioze.
“Duke ditur faktin se tashmë në Gjykatën Themelore në Prishtinë është iniciuar një konflikt administrativ në mes të MAPL-së dhe Komunës së Prishtinës, ndër të tjera edhe për çështjen e kryesuesit, vlerësojmë se thirrja dhe organizimi i kësaj mbledhje në këtë kohë është i panevojshëm dhe tendencioz”, thuhet në komunikatën e LVV-së.
Sipas tyre, çdo vendim që merret në këtë kohë duhet të ritrajtohet për shkak të paqartësive juridike.
“Kërkojmë nga partitë në pushtet në Komunën e Prishtinës, koalicioni LDK-PDK-NISMA-LB, të përmbahen nga çfarëdo vendimi e veprimi në këtë fazë dhe gjithashtu kërkojmë nga Gjykata Themelore në Prishtinë që sa më parë, me prioritet, ta trajtoj çështjen në fjalë”, thuhet në komunikatën e LVV-së.
