Policia e Kosovës njofton se është duke zbatuar urdhëresën e gjykatës kompetente për kontrolle, në pesë lokacione në tri komunat në veri të Kosovës. Këto operacione janë duke u zhvilluar lidhur me ngjarjet e fundit të ndodhura në fshatin Banjskë.
“Operacioni policor është duke vazhduar nga njësitet relevante të Policisë së Kosovës, me prezencën në vend ngjarje të Prokurorit (të PSRK-së). Me këtë rast Policia e Kosovës njofton qytetarët se nuk kanë nevojë për ndonjë shqetësim. Këto urdhër kontrolle, janë duke u zbatuar në koordinim me EULEX dhe KFOR”, thuhet në komunikatën e Policisë së Kosovës.
Policia ndodhet para objektit të banimit në Mitrovicë ku ka jetuar Milan Radoiçiq, ku ndodhet edhe restoranti Grey, transmeton Radio Kontkat plus.Dy oficerë policie kanë nxjerrë nga godina ku ndodhet lokali Grey dy thasë letre, të cilat i kanë ngarkuar në makinën zyrtare. Nuk dihet se çfarë ka në to, transmeton KoSSev .Së paku tri autoblinda të Policisë së Kosovës janë para lokalit dhe objektit të banimit, rruga është e bllokuar për qarkullim, por jo për këmbësorë. Dy forca speciale janë në hyrje të rrugës.
