Ministrja e Drejtësisë, Albulena Haxhiu, duke komentuar lirimin e Milan Radojiçiqit, ka thënë se asnjë veprim i Serbisë nuk i befason. Haxhiu ka deklaruar se Serbia është strehë për kriminelët e luftës dhe terroristët.
Ministrja, Albulena Haxhiu, ka theksuar se Serbia nuk i ka dorëzuar asnjëherë kriminelët e luftës e nuk do t’i dorëzojë as terroristët.
“Sulmi terrorist në Kosovë është dirigjuar, siç është dëshmuar, nga Serbia dhe në këtë drejtim, çfarëdo veprimi në raport me këtë çështje, me grupin e armatosur, që e bën Serbia nuk na befason aspak. Serbia nuk i ka dorëzuar asnjëherë kriminelët dhe nuk do t’i dorëzojë as terroristët. Thënë qartë, Serbia është strehë e kriminelëve të luftës dhe terroristëve që para 10 dite bën sulm terrorist në territorin e Kosovës”, ka thënë ministrja Haxhiu.
Ajo ka siguruar qytetarët që institucionet e drejtësisë janë duke bërë punë të mirë për ta hetuar sulmin e terrorist në Banjskë të Zveçanit, ku u vra rreshteri Afrim Bunjaku, tash hero i Kosovës.
“Përballë një Serbie që nuk distancohet nga e kaluara, dirigjon sulme të armatosura në Kosovë dhe nuk i dorëzon kriminelët dhe terroristët, është vigjilenca, puna e madhe e institucioneve të Kosovës, veçanërisht Policia e Kosovës, njësiteve të hetimeve, njësiteve speciale, Prokurorisë dhe Gjykatës. Institucionet e drejtësisë po e bëjnë punën e tyre. Për shkak të hetimeve, nuk mund të jap detaje çfarë po ndodh. Vetëm desha t’iu siguroj që institucionet po bëjnë punën e tyre”, ka thënë ajo.
Haxhiu, ka përsëritur edhe një herë që Kosova do të kërkojë dorëzimin e Radojiçiqit.
