Qeveria e Mbretërisë së Bashkuar do të prezantojë një projektligj në Parlament që do të ndalojë shitjen e produkteve të duhanit për personat e lindur pas 1 janarit 2009.
Në fakt, mosha e shitjes së cigareve do të rritet me një vit çdo vit derisa të “përhapet në të gjithë popullsinë”. Kjo potencialisht do të bëjë të mundur ndalimin pothuajse plotësisht të pirjes së duhanit tek të rinjtë deri në vitin 2040, sipas një publikimi në faqen e internetit të qeverisë britanike.
“Dua të ndërtoj një të ardhme më të mirë dhe më të ndritshme për fëmijët tanë, prandaj dua të eliminoj duhanin përgjithmonë. Këto ndryshime do të nënkuptojnë që fëmijët tanë nuk do të mund të blejnë kurrë një cigare, gjë që do t’i pengojë ata të bëhen të varur nga cigaret dhe mbrojnë shëndetin e tyre si tani ashtu edhe në të ardhmen”, tha kryeministri britanik Rishi Sunak, autor i nismës.
Sipas qeverisë, 64,000 njerëz vdesin çdo vit në Mbretërinë e Bashkuar si pasojë e pirjes së duhanit. Deri në 75 mijë vizita te mjeku i përgjithshëm çdo muaj janë për shkak të sëmundjeve të lidhura me duhanin. Çdo vit ekonomia humbet 17 miliardë funte për shkak të papunësisë së lidhur me duhanin, vdekshmërisë së hershme dhe kostove të kujdesit shëndetësor.
“Pirja e duhanit nuk do të kriminalizohet dhe qasja jonë me faza do të thotë që kushdo që mund të blejë ligjërisht cigare tani nuk do të pengohet ta bëjë këtë në të ardhmen,” tha qeveria në një njoftim.
