Shefi i NATO-s, Jens Stoltenberg e ka bërë të qartë qëndrimin e Aleancës Veri-Atlantike sa i përket tensioneve të fundit në Kosovë. Ai ka thënë se trupat e NATO-s janë të gatshme ta ruajnë paqen në Kosovë dhe nuk do të lejojnë përsëritjen e viteve 90-ta.
“Situata në Kosovë është shkas për shqetësim të madh”, tha Sekretari i Përgjithshëm i NATO-s, Jens Stoltenberg për gazetën gjermane “Die Welt”, disa ditë para takimit të ministrave të mbrojtjes të NATO-s në Bruksel.
“Dua të them shumë qartë: trupat e NATO-s janë të gatshme të ruajnë paqen në Kosovë. Nuk do të lejojmë që dhuna e viteve 1990 të kthehet”, tha ish-kryeministri norvegjez.
Dy javë më parë, grupi terrorist serb i udhëhequr nga kryekrimineli Milan Radojiçiq, i mbështetur nga qeveria në Beograd sulmoi Policinë e Kosovës në Banjskë, me ç’rast u vra rreshteri Afrim Bunjaku.
Ndërkohë, trupa shtesë të ushtrisë serbe janë grumbulluar edhe në kufirin me Kosovën.
Përkundër tensioneve të fundit mes Kosovës dhe Serbisë, Stoltenberg ka kërkuar që ato duhet t’i kthehen dialogut të ndërmjetësuar nga BE-ja.
“Kjo është mënyra e vetme për të arritur paqe të qëndrueshme për të gjitha komunitetet”, tha shefi i NATO-s.
