Rusia gjithmonë ka mbrojtur zbatimin e vendimit të Këshillit të Sigurimit të OKB-së për krijimin e një shteti të pavarur palestinez, tha presidenti rus Vladimir Putin në seancën plenare të Javës Ruse të Energjisë. “Ne gjithmonë kemi mbështetur zbatimin e vendimeve të Këshillit të Sigurimit të OKB-së, mbi të gjitha nënkuptoj krijimin e një shteti të pavarur palestinez. Dështimi për të zbatuar këtë vendim është rrënja e të gjitha problemeve”, tha Putin.Ai tha gjithashtu se qëndrimi rus për zgjidhjen e konfliktit palestinezo-izraelit nuk ka lindur nga ngjarjet e fundit tragjike, por është formuar gjatë dekadave të fundit. “Dhe ky pozicion është i njohur mirë për palën izraelite dhe miqtë tanë në Palestinë”, shtoi presidenti rus, sipas TASS-it shtetëror .
Ai vuri në dukje se çështja palestinezo-izraelite u shoqërua dhe u rëndua nga të ashtuquajturat “aktivitete ndërmjetësuese” të një numri vendesh në vitet e fundit, të cilat vetëm sa e komplikuan situatën. Sipas presidentit rus, në shumë vende, përfshirë Izraelin, sot ka figura politike dhe ekspertë që besojnë se është e nevojshme të shkohet në rrugën e krijimit të një shteti të pavarur palestinez. “Dhe ka njerëz dhe qëndrime të tilla në Izrael. Por ata që janë përpjekur ta zgjidhin me dhunë këtë problem prej dekadash kanë një avantazh. Fatkeqësisht, kjo çon në ngjarje të tilla tragjike siç po i shohim tani”, tha Putin.
