Ministrja e Ekonomisë, Artane Rizvanolli, në deklarimin pas mbledhjes së Qeverisë ka paralajmëruar ceremoninë e inaugurimit të Parkut të Teknologjisë “Tech Park Prishtina” në Bërnicë.
Rizvanolli ka thënë se me këtë inaugurim do të plotësohet një kërkesë e kamotshme e teknologjisë në vend.
“Parku teknologjik i pari i tillë në Kosovë do të jetë mundësi për biznese ‘start up’ por edhe për biznese më të zhvilluara, po flasim për dhjetëra biznese që do të vendosen aty në fushën e teknologjisë”, ka thënë ajo.
Për këtë park Ministria e Ekonomisë ka ndarë afër 1.2 milionë euro për krijimin dhe funksionalizimin e tij, kurse Ministria e Industrisë, Ndërmarrësisë dhe Tregtisë i ka dhënë Shoqatës për teknologji Informative dhe të Komunikimit të Kosovës (STIKK) hapësirën në shfrytëzim për 5 vite, për inovacion dhe ndërmarrësi.
