Ministri i Administrimit të Pushtetit Lokal, Elbert Krasniqi, në një konferencë për media ka folur për marrëveshjen e Bratislavës, sipas të cilës, janë reduktuar forcat policore në dhe përreth objekteve komunale në komunat veriore.
Po ashtu, ai theksoi edhe mbajtjen e zgjedhjeve të jashtëzakonshme në komunat veriore, për të cilat thotë se Kosova ka bërë çfarëdo që është në dorën e saj.
“Nga ai moment Qeveria e Kosovës ka ndërmarrë disa veprime si zotim i atij diskutimi që të kontribuoj në qetësimin e situatës dhe krijimin e kushteve për zgjedhje të parakohshme. Si Qeveri gjithmonë kemi thënë se jemi për zgjedhje të parakohshme mirëpo deri te shkuarja atje duhet të shkohet në një proces demokratik. Për këtë ne e kemi iniciuar draftimin e udhëzimit administrativ i cili ka hapur rrugën që qytetarët në veri të vendit dhe gjitha komunave tjera të iniciojnë procesin demokratik për largimin e kryetarëve përmes peticionit. Kjo ishte njëra nga veprimet e ndërmarra nga Qeveri e Kosovës si shenjë e përkushtimit për qetësimin e situatës. Në anën tjetër, dy herë nga 25 për qind e policëve në objektet e komunave dhe përreth janë larguar pas vlerësimit të situatës mes policisë së Kosovës dhe KFOR-it. Në anën tjetër grupet kriminale organizohen për grupe terroriste”, tha ministri.
Krasniqi tha se masat ndëshkuese ndaj Kosovës nga ana e BE-së janë të padrejta dhe sipas tij duhet të vlerësohet situata drejt edhe me atë çka ka bërë Serbia.
“Masat ndaj Kosovës kanë qenë të padrejta atëherë dhe mbesin të padrejta edhe sot, Kosova ka bërë çfarëdo që ka qenë në dorën e saj për mbështetjen e këtij procesi. Beogradi ka dërgu terroristë. Duhet të vlerësohet situata drejt. Nga 24 e këtej gjithçka është ndryshe dhe duhet të reflektohet”, u shpreh ai. /Kosovatimes/
