Senatorja amerikane Jeanne Shaheen në konferencën për media pas takimit me kryeministrin Albin Kurti ka thënë se shtetet evropiane dhe ShBA-të janë të koncentruara në rajonin e Ballkanit Perëndimor dhe stabilitetin në këtë zonë.
“Mendojmë se është shumë e rëndësishme që përgjegjësit të japin llogari sipas sundimit të ligjit dhe Serbia të bashkëpunojë në hetimet e vazhdueshme. Është kohë e duhur dhe një përkujtim i mire që stabiliteti afatgjatë i këtij rajoni dhe Kosovës nënkupton një marrëveshje me Serbinë për të adresuar në mënyrë paqësore dallimet mes vendeve tuaja”, ka thënë ajo.
Tutje theksoi se SHBA qëndrojnë me Kosovën dhe nuk duan të shohin një konflikt tjetër në këtë rajon.
“E pamë javën e kaluar se çka ndodhi kur ka urrejtje, konflikt dhe çështje të pazgjidhura ku qytetarët janë ata që humbasin në një situate të tillë. E di se qytetarët e Kosovës e kuptojnë çfarë ndodh kur ka konflikt dhe ndikimin e paparashikueshëm në familjet. Nuk duam që të ketë më shumë konflikt, siç po e shohim në Ukrainë. Prandaj stabiliteti dhe lidershipi janë të rëndësishme për Kosovën. SHBA qëndrojnë krahë jush”, u shpreh senatorja.
Tutje tha se ndihet mire kur sheh rritjen e trupave ushtarak të KFOR-it sepse kjo siguron siguri dhe stabilitet.
Kryeministri Kurti ka thënë se dialogu nuk mund të vazhdoj duke i injoruar sulmet terroriste të Serbisë ndaj Kosovës.
“Dialogu i ndërmjetësuar nga BE nuk mund të vazhdoj thua se s’ka ndodhur asgjë. Nuk mund të vazhdojmë punën dhe këtë status quo edhe më tutje, kapitulli i dialogut duhet të merr parasysh edhe veprimet sulmuese e agresive të Serbisë dhe përpjekjet e saj për aneksimin e Kosovës”, ka thënë Kurti.
Tutje kryeministri ka thënë se Serbia duhet të mbahet përgjegjëse për atë që ka kryer më 24 shtator në veri të vendit, ose përndryshe sulmet mund të rishfaqen.
“Institucionet e inteligjencës sonë kanë vërejtur se ka pasur rritje të rrezikut për sulme nga Serbia dhe qëllimi i këtyre grupeve është të portretizohet Kosova thua se ka force kundër serbëve. Unë jam kryeministër i gjithë Kosovës, i të gjitha komuniteteve prandaj të gjitha këto përpjekje për destabilizim duhet të ndërpriten tani. Serbia duhet të mbahet përgjegjëse për ndryshe këto sulme agresive do të vazhdojnë edhe më tutje”, ka deklaruar kryeministri.
