Në hapësirën e shkollës “Tefik Çanga” në Ferizaj, u zhvillua xhiroja e fundit e kampionatit ekipor për kategoritë U19 për meshkuj dhe femra, si dhe për U15 për femra.
Garat filluan me dy ndeshje që pritej të ishin derbi të javës, vendimtare për të përcaktuar kampionët e kategorisë U19 dhe pritjet nuk u tradhtuan.
Në kategorinë e meshkujve, klubet “Ahmet Hoxha MK” nga Ferizaj dhe “Lidhja e Prizrenit” nga Prizreni u përballën në një ndeshje emocionuese, me tension të lartë sepse në sezonin pranveror “Lidhja e Prizrenit” kishte fituar ndeshjen me rezultat 3:2 dhe momente të mëdha. Protagonisti i kësaj ndeshje ishte padyshim Anes Behluli i cili shënoj dy fitore të rëndësishme, kundër Blend Hajdarit dhe Shaban Pezes, duke i sjell fitoren ekipit vendas.
Lojtarët e të dy ekipeve zhvilluan lojë të shkëlqyer dhe me pikë mjaft interesante, por në fund, “Kpp Ahmet Hoxha MK”nën drejtimin e trajnerit Ardian Lamaxhema triumfoi me rezultat 3:1 për tu shpallur kështu kampion i kategorisë U19 për meshkuj, ndërsa nënkampion i kategorisë u shpall “Lidhja e Prizrenit”.
Një ndeshje tjetër derbi ishte edhe ajo e kategorisë së femrave për U19, ku Kpp “Ahmet Hoxha F” u ndesh me ekipin “Lidhja e Prizrenit”. Vajzat nga të dy ekipet zhvilluan një ndeshje tërheqëse dhe emocionuese, pasi rezultati ishte gjithmonë i ngushtë dhe rëndësia e ndeshjes ishte e madhe.
Kpp “Lidhja e Prizrenit” arriti të fitonte ndeshjen me rezultat 3:2, mirëpo kjo nuk mjaftoi, sepse në sezonin pranveror Kpp “Ahmet Hoxha F” kishte fituar ndeshjen me rezultat 3:1. “Ahmet Hoxha F” të udhëhequra nga Ridvan Hashani, festoi titullin e kampionit, ndërsa nën kampione u shpallën vajzat e ekipit “Lidhja e Prizrenit”.
Vajzat nga klubi “Ahmet Hoxha MK” u shpallën kampione të kategorisë U15 për femra. Ato festuan titullin e fituar me fitore kundër ekipit “Ahmet Hoxha F”, ndërsa nënkampion i kategorisë U15 F u shpall klubi “Artana”.
Sot, u mësuan edhe emrat e 4 ekipeve që do të garojnë në fazën e Play Off të ligës U15. Nga liga U15(A), në fazën e play Off u kualifikuan ekipet “Ahmet Hoxha MK” dhe “Vushtrria”, ndërsa nga Liga U15(B) tutje do të vazhdojnë garën “Lidhja e Prizrenit” dhe “Shkolla Prizreni”.
Këto katër ekipe do të përballen me sistem 1A kundër 2B dhe 1B kundër 2A për të përcaktuar kampionin e kategorisë U15.
KPP “Peja F” për shkak të mos zhvillimit të më shumë se tri ndeshje diskualifikohet nga liga U19F. /Kosovatimes/
