Sot në mëngjes, sulmet ajrore izraelite goditën aeroportet ndërkombëtare në kryeqytetin sirian Damask dhe në qytetin e Alepos në veri, duke vrarë një person, njoftuan mediat shtetërore siriane.
Pistat janë dëmtuar dhe aeroportet janë jashtë funksionit.
Ky është sulmi i dytë këtë muaj në aeroportin e Damaskut dhe i treti në aeroportin e Aleppos, pasi tensionet rriten në Lindjen e Mesme për shkak të luftës midis Izraelit dhe Hamasit.
Media shtetërore siriane, duke cituar një zyrtar ushtarak të paidentifikuar, njoftoi se fushat ajrore u sulmuan nga drejtimi i Detit Mesdhe në perëndim dhe lartësitë e Golanit në jug.
Në Damask ka mbetur i vrarë një punonjës dhe një tjetër është plagosur dhe janë shkaktuar dëme materiale.
Ushtria izraelite ende nuk ka komentuar.
Që nga fillimi i luftës midis Izraelit dhe Hamasit më 7 tetor, ushtria izraelite ka sulmuar disa herë objektiva në Siri, përfshirë aeroportet. Fluturimet u devijuan më parë në një aeroport ndërkombëtar në provincën bregdetare të Latakias.
Izraeli ka shënjestruar aeroportet dhe portet në pjesët e kontrolluara nga qeveria të Sirisë në një përpjekje të dukshme për të parandaluar dërgimin e armëve nga Irani për organizatat ekstremiste të mbështetura nga Teherani, duke përfshirë Hezbollahun e Libanit.
Mijëra luftëtarë të mbështetur nga Irani i janë bashkuar konfliktit 12-vjeçar të Sirisë dhe kanë ndihmuar presidentin sirian Bashar Assad.
Izraeli ka kryer qindra sulme në pjesët e kontrolluara nga qeveria të Sirisë, por rrallë merr përgjegjësinë për operacione të tilla.
