Mike Johnson, një republikan 51-vjeçar nga Luiziana, një mbështetës i Trump dhe një kundërshtar i ndihmës së mëtejshme për Ukrainën, është shpallur zyrtarisht si Kryetari i ri i Dhomës së Përfaqësuesve të SHBA. Në votimin e Dhomës, ai mori 220 vota, kundërshtari i tij, demokrati Hakeem Jeffries, 209.
Kështu, siç theksojnë mediat ndërkombëtare, është mbyllur çështja e kryeparlamentarit në Dhomën e Përfaqësuesve. Ajo zgjati 22 ditë. Kryetari i mëparshëm Kevin McCarthy u rrëzua nga posti tre javë më parë.
Sipas BBC , Johnson shihet nga republikanët e ekstremit të djathtë si një konservator i vendosur dhe mbështetës i Donald Trump. Republikanët e moderuar e shohin atë si një pragmatist që përkrah vlerat konservatore.
Demokratët, megjithatë, shqetësohen se Mike Johnson është shumë i djathtë. Ai mban qëndrime të forta konservatore për një sërë çështjesh politike, të tilla si kundërshtimi i të drejtave të abortit dhe martesat e homoseksualëve.
Presidenti Joe Biden tha se ai nuk është i shqetësuar për zgjedhjen e një kryetari të ri republikan mes bisedave për aftësinë e Mike Johnson për të ndikuar në rezultatin e zgjedhjeve presidenciale të vitit 2024. “Unë e kuptoj Kushtetutën e SHBA,” tha Biden.
