Donika Gërvalla, zëvendëskryeministrja dhe ministrja e Punëve të Jashtme dhe Diasporës së Republikës së Kosovës, po merr pjesë në Konferencën Ministrore të Frankofonisë.
Përmes një njoftimi për medie, bëhet e ditur se zëvendësministrja Gërvalla është ftuar nga Organizata Ndërkombëtare e Frankofonisë, e cila mban konferencë dyditore për çështje të stabilitetit politik dhe zhvillimit ekonomik në vendet frankofone, ku këtë radhë, si temë qendrore trajton temën: “Qeverisja e mirë: Garancia e stabilitetit politik, ekonomik dhe kulturor për qytetarët frankofonë”.
Tutje bëhet e ditur se Kosova është anëtare e asociuar e Organizatës Ndërkombëtare të Frankofonisë dhe statusin e vet synon ta avancojë në anëtar me të drejta të plota në Samitin e ardhshëm të kësaj Organizate, që do të mbahet vitin e ardhshëm në Francë.
“Në margjinat e kësaj konference dyditore, ministrja Gërvalla po shfrytëzon mundësinë e takimeve me shumë përfaqësues të shteteve anëtare frankofone nga Afrika dhe jo vetëm, kryesisht shtete që ende nuk e kanë njohur Republikën e Kosovës, me qëllim të ndikimit tek ato vende në drejtim të njohjes sa më parë të Kosovës”, thuhet në komunikatë.
