Ministrja e Drejtësisë, Albulena Haxhiu ka deklaruar se drafti i statutit të Asociacionit të komunave me shumicë serbe nuk është bërë publik, ngase ka një kërkesë nga ndërmjetësuesit që ai të mos bëhet publik dhe se “kryeministri Kurti është partner serioz që i trajton me respekt dhe konsideratë kërkesat e ndërmjetësve të dialogut”.
“Ai e ka ekipin e tij për dialog me të cilin ndanë dokumente të cilat kanë nevojë të vlerësohen por edhe të komentohen, konsultohet me presidenten e Kosovës, e po ashtu me kryetarin e Kuvendit, të cilët janë krerë të institucioneve. Kur ka nevojë për vlerësime të mia si ministre e Drejtësisë, jam gjithmonë në dispozicion. Në mbledhjen e fundit të kryesisë së LVV na ka njoftuar në vija të trasha mbi propozimin evropian-amerikan. Para seancës për raportim në Kuvend, ai e ka njoftuar edhe grupin parlamentar për mbarëvajtjen e takimit dhe qëndrimin e Kosovës në lidhje më këtë ka pasur debat edhe në Kuvendin e Kosovës. Sa për kryeministrin Kurti, teksti mund të jetë publik që prej dje, por kjo nuk mund të ndodhë. Kryeministri ka qenë transparentë për aq sa ka qenë e mundur edhe në Kuvendin e Kosovës sepse e dini se ka kërkesë që drafti të mos bëhet publik, prandaj duke qenë partner serioz nuk është bërë publik”, ka theksuar Haxhiu.
Ajo foli edhe për padinë për gjenocid ndaj Serbisë, për të cilën tha se po punohet por që për shkak të ndjeshmërisë nuk mund të jap më shumë detaje. Ndërkaq, sa i përket Kodit Civil ajo tha se nuk është proceduar në Kuvend për shkak se nuk duan të mos të votohet si herën e parë.
