Në Kuvendin e Kosovës po vazhdon shqyrtimi i parë i Projektligjit për ndarjet buxhetore për Buxhetin e Kosovës për vitin 2024.
Kryeministri Albin Kurti ka thënë se buxheti i vitit 2024 do të jetë buxhet i mbrojtjes dhe sigurisë, pasi për këtë janë ndarë 22% më shumë buxhet se që kishte në vitin 2023. Kurti ka thënë se për mbrojtje dhe siguri janë ndarë 370 milionë euro, shuma më e madhe e ndarë ndonjëherë.
“Buxheti i Kosovës për vitin 2024 do të jetë 3.3 miliardë euro, ai do të jetë buxhet i mbrojtjes dhe sigurisë, për çfarë kemi ndarë 370 milionë euro, ose 22% më shumë sesa aktualisht. 153 milionë euro për Ministrinë e Mbrojtjes dhe 216 milionë euro për Ministrinë e Punëve të Brendshme, më shumë se ndonjëherë”, tha Kurti në Kuvendin e Kosovës, ku prezantoi projektbuxhetin për vitin e ardhëm.
sovës po vazhdon shqyrtimi i parë i Projektligjit për ndarjet buxhetore për Buxhetin e Kosovës për vitin 2024.
Kreu i ekzekutivit, bëri të ditur se Kosova në vitin 2024 do t’i ketë edhe 600 ushtarë dhe 500 policë të rinj.
Kryeministri Kurti ka paraqitur edhe ndarjet buxhetore që parashihen për sektorët e tjerë.
“Do të vazhdojmë renovimin e spitaleve, përmirësimin e shërbimeve dhe blerjen e pajisjeve të teknologjisë së fundit. Për 2024 SHSKUK i është shtuar buxheti për 25, kurse shëndetësisë si sektor kemi ndarë mbi 340 milionë euro. Ministrisë së Drejtësisë ia kemi ndarë 31% më shumë buxhet që të zbatohen reformat e nisura. Do të ketë investime të reja infrastrukturore… Vetëm për MKRS kemi ndarë 58 milionë euro për investime kapitale në sport e infrastrukturë për vitin që po vjen. Buxheti i komunave më 2021 ishte 547 milionë, sivjet është 654 milionë euro. Më 2024 do jetë gati 200 milionë më shumë. Ky buxhet është po ashtu buxhet i komunave”, ka deklaruar ai.
Ndarje nga buxheti është parashikuar edhe për Luginën e Preshevës, dhe ajo sipas tij, do të rritet për 1 milion.
“Buxheti i vitit të ardhshëm do të jetë buxhet për shqiptarët e Preshevës Medvegjës dhe Bujanocit. Atij po ia shtojmë edhe një milion, nga 2 në 3 milionë për vitin 2024”, ka theksuar kryeministri.
Muja: Shpenzimet e propozuara buxhetore propozohen të jenë 3 miliardë e 314 milionë euro
Kryetari i komisionit funksional për buxhet punë dhe transfere, deputeti Armend Muja, tha se komisioni për buxhet punë dhe transfere e ka shqyrtuar projektligjin për ndarje buxhetore të vitit 2024 dhe pas diskutimeve dhe sqarimeve të marra nga ministria e Financave e ka miratuar në parim.
Sipas tij shpenzimet e propozuara buxhetore propozohen të jenë 3 miliard e 314 milion euro.
“Propozimi mbështetet në një projeksion të të hyrave prej 3 miliard e 28 euro dhe nevojën për financim të jashtëm dhe të brendshëm. Bilanci i propozuar buxhetor është brenda rregullës fiskale, ashtu sic parashihet në ligjin për menaxhimin e financave publike dhe përgjegjësinë”, tha Muja.
Kurse për borxhin e përgjithshëm bazuar në propozimin për ndarje buxhetore Muja tha se parashihet të jetë 20.7% në raport me bruto produktin vendor, që sipas tij paraqet një rritje të lehtë krahasuar me 19.7% sa parashihet të jetë deri në fund të vitit 2023 .
Muja foli edh në emër të grupit parlamentar të Vetëvendosjes Muja tha se projekt propozimi i buxhetit për vitin 2024 është pak a shumë konform programit qeveritar i cili mbështetët po ashtu edhe ne propozimet programore të Lëvizjes Vetëvendosje në vitin 2021. Ai tha se janë pesë shtylla të veçanta të projekt buxhetit të vitit 2014.
Lushtaku: Një planifikim i mirëfilltë i buxhetit do të kontribuonte në nevojat sociale
Mërgim Lushtaku nga PDK ka thënë se nëse planifikimi buxhetor nuk ndodh mbi baza sociale, ai do të përkeqësojë edhe më tej gjendjen në vend.
“Sot flasim për një planifikim buxhetor i cili do të duhej të ndihmonte, por po shihet që është aq i dobët saqë s’ka asnjë promovim, asnjë projekt të ri dhe që qytetarët nuk do t’ia shohin hajrin. Një planifikim i mirëfilltë i buxhetit do të kontribuonte në nevojat sociale, për këtë arsye mbetet instrumenti fondamental”, ka thënë Lushtaku.
Hoti: Në total mazhoranca ka menaxhuar 11. 4 miliardë euro
Deputeti i LDK-së Avdullah Hoti në shqyrtimin e Projekt Buxhetit të vitit 2024 tha se gjatë mandatit qeverisës 2021-2024 në total mazhoranca ka menaxhuar (me buxhetin e vitit 2024), 11. 4 miliard euro.
E që sipas tij, deri më tani janë shpenzuar 8.1 miliard euro, duke shtuar se efektet konkrete të këtyre shpenzimeve janë shumë të pavërejtshme, e që siç tha ai njëra ndër arsyet është se ka ndërruar struktura e buxhetit.
“Nëse krahasohet viti 2017 me vitin 2022, investimet kapitale kanë rëne nga 36% në 16% të buxhetit si shpenzim real, ndërkaq subvencionet janë rritë nga 23% në 41% të buxhetit”, tha Hoti.
Ai tha se vetëm për subvencionim të energjisë në veri janë shpenzuar 113milion euro.
Haradinaj: Rritja nominale prej vetëm 102 milionë euro, është zvogëlim i buxhetit
Kryetari i AAK-së, Ramush Haradinaj, ka pasur kritika për mënyrën e rritjes së buxhetit.
“Rritja nominale prej vetëm 102 milionë euro, praktikisht është zvogëlim real i buxhetit, duke marrë parasysh shkallën e inflacionit këtë vit dhe vitin që vjen. Kjo është rritja më e vogël e buxhetit që nga çlirimi i vendit. Rritja e vlerës së koeficientit të pagave nga 105 në 110 euro nuk është rritje, e as harmonizim, por zvogëlim real i pagave”, ka thënë Haradinaj.
