Në Dhomat e Specializuara në Hagë vazhdon, sot nga ora 09.30, procesi gjyqësor ndaj ish-pjesëtarit të UÇK-së, Pjetër Shala.
Në Dhomat e Specializuara të Kosovës (DhSK) në Hagë, të mërkurën, ka përfunduar dëshminë e tij dëshmitari, Zijadin Hoxha, kurse pas tij, po dje, ka filluar dëshminë ish-deputetja e Partisë Demokratike të Kosovës (PDK), Safete Hadergjonaj me kodin W0441, në çështjen gjyqësore ndaj Pjetër Shalës.
Hadergjonajn ka filluar që ta marrë në pyetje avokati i Pjetër Shalës, Jean-Louis Gilissen, raporton “Betimi për Drejtësi”. Dëshmitarja e quajti gjykatë qesharake Gjykatën Speciale, duke thënë se ish-pjesëtarët e Ushtrisë Çlirimtare të Kosovës kanë shkuar aty me sajesa nga Shërbimi Sekret Serb.
Gjatë dëshmisë së saj, Hadergjonaj ka thënë se nuk ka qenë asnjëherë pjesë e UÇK-së. Avokati Jean-Louis Gilissen i tha dëshmitares së në dosjen e cila tani po trajtohet, kanë prova që e nxjerrin atë në Kukës, e në dëshminë e saj tha se asnjëherë nuk ka qenë në Kukës dhe se nuk ka qenë motër medicinale.
Ajo tha se i është dukur qesharake kur e ka marrë ftesën si dëshmitare në këtë proces, për një person që kurrë nuk e kishte parë.
Safete Hadergjonaj, gjatë dëshmisë së saj po ashtu ka thënë se qëndrimi i saj është se akuzat e ngritura ndaj pjesëtarëve të Ushtrisë Çlirimtare të Kosovës, janë të motivuara nga Serbia dhe me sajesa nga shërbimi sekret serb.
Në çështjen gjyqësore Shala, për këtë javë pritet të mbahen pesë seanca, raporton RTKlive.
Ai ndodhet në qendrën e paraburgimit në Hagë prej marsit të vitit 2021.
Pjetër Shala u arrestua më 16 mars 2021 nga autoritetet belge dhe u transferua në Hagë më 15 prill të atij viti, n bazë të një kërkese për bashkëpunim në zbatimin e fletarrestit dhe urdhrit për transferim lëshuar nga Dhomat e Specializuara të Kosovës.
Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.
