Ministrja e Jashtme e Rumanisë, Luminita Odobescu, ka takuar emisarin e BE-së për dialogun Kosovë-Serbi, Miroslav Lajçak. Ajo përmes një postimi në platformën X, ka theksuar se i ka ofruar mbështetje Lajçakut për dialogun Kosovë- Serbi.
“Shumë e kënaqur që të takoj përfaqësuesin special sot në Bukuresht. Një shkëmbim i mirë për zhvillimet e fundit në Ballkanin Perëndimor. Ritheksova mbështetjen e plotë të Rumanisë për përpjekjet e tij për të çuar përpara dialogun Beograd-Prishtinë të udhëhequr nga BE-ja që është thelbësor për sigurinë dhe stabilitetin në Ballkanin Perëndimor”, ka shkruar ajo.
Rumania është një ndër pesë shtetet anëtare të Bashkimit Europian që nuk njeh pavarësinë e Kosovës.
