Ministri i Brendshëm, Xhelal Sveçla, gjatë vizitës ssë tij zyrtare në Kroaci, ka takuar Zëvendëskryeministrin dhe Ministrin e Punëve të Brendshme të Republikës së Kroacisë, Davor Bozhinoviç.
“Me këtë rast Bozhinoviç e njoftova për përkushtimin dhe rezultatet tona në luftën kundër çdo lloj krimi që cenon sigurinë e vendit tonë dhe qytetarëve tanë dhe e falënderova për mbështetjen e vazhdueshme të Kroacisë si dhe për gatishmërinë për të thelluar dhe më tutje bashkëpunimin mes dy ministrive tona”, ka shkruar ministri i brendshëm në ‘Facebook’.
Ai ka njoftuar se të dy kanë biseduar për situatën e sigurisë dhe rreziqet e mundshme për destabilizim të rajonit.
“Në bisedimet tona kishim në fokus tek sulmet e njëpasnjëshme të strukturave kriminale të Serbisë ndaj institucioneve dhe zyrtarëve tanë në veriun e vendit tonë e veçanërisht për sulmin terrorist të 24 shtatorit në Banjskë ku mbeti i vrarë Rreshter Afrim Bunjaku”, shkruan Sveçla.
Ai ka thënë se e ka njoftuar Bozhinoviç-in për dëshmitë e institucioneve që tregojnë lidhjen dhe angazhimin direkt të Serbisë me të gjithë mekanizmat e saj në realizimin e këtij sulmi.
“Institucionet tona gëzojnë bashkëpunim të shkëlqyer me ato të Kroacisë dhe duke njohur faktin që vetëm përmes bashkëpunimit të ngushtë mund të kontribuojmë për sigurinë në rajon dhe më gjerë, u dakorduam për thellim të mëtejmë të raporteve tona shtetërore”, tha Sveçla.